गौशालामा श्रीमान र नन्द मिलेर विष सेवन गराई गरे एक महिलाको हत्या, श्रीमान पक्राउ

2 वर्ष पहिले प्रकाशित

(2080-01-09 B.S.)

22870 पटक देखिएको

गौशाला , वैशाख ९ गते

महोत्तरीको गौशालामा आफ्नै श्रीमान र नन्द मिलेर विष सेवन गराई एक महिलाको हत्या गरेका छन्।

जिल्लाको गौशाला नगरपालिका वडा न. ४ रजखोर निवासी करिब ३८ वर्षीय श्रीमान उमेश साहले आफ्नै श्रीमतीलाइ कुटपिट गरि विष सेवन गराई हत्या गरेको युवतिका माइती पक्षको आरोप छ । जसमा नन्द करिब २७ वर्षीय आशा साहको पनि संलग्नता रहेको मृत युवतिको बुबा बलि साहको भनाइ छ।

उनका अनुसार गएराति शुक्रबार श्रीमान र नन्द मिलेर युवतिलाइ मरणासन्न हुनेगरि कुटपिट गरि विष सेवन गराएका थिए। विष सेवनबाट घाइते युवतिलाइ उपचारको लागि गौशालाको प्राथमिक स्वास्थ्य केन्द्रमा राति नै ल्याइएको थियो । त्यहाँ उपचार सम्भव नभएपछी बर्दिबासको साइमल्टी स्पेस्यालिटि ट्रमा सेन्टरमा उपचारको क्रममा युवतिको राति साढे १२ बजेको समयमा मृत्यु भएको बुबा साहले बताए।

मृतक युवतिको उमेश साहसंग विवाह भएको ६ वर्ष बितीसकेको छ । उनको ३ वर्षीय छोरी र ७ महिनाको एक छोरा छ । श्रीमान र श्रीमतीविच वर्षौदेखि आपसी विवाद हुदै आइरहेको थियो। श्रीमानले मृतक युवतिलाइ मन नपराएको र सोहि विषयलाइ लिएर पटक पटक कुटपिट ,झैँझगडा र विवाद हुने गरेको छरछिमेकले बताए।

आफ्नो छोरीलाइ विष सेवन गराई हत्या गरेको आरोप लगाउदै मृतक युवतिको माइती पक्षले हत्यामा संलग्न श्रीमान र नन्दलाइ कडा भन्दा कडा कारवाहीको माग गरेका छन् ।

युवतिको हत्या गरेको आशंकामा प्रहरीले श्रीमान उमेश साहलाइ पक्राउ गरेको र नन्द आशा फरार रहेकोले उनको खोजिकार्य भईरहेको इलाका प्रहरी कार्यालय गौशालाका प्रहरी निरीक्षक मनोज यादवले जानकारी दिए ।