भाग्यरेखा ठाकुर
महोत्तरी, असोज २५ गते।
महोत्तरीको गौशाला नगरपालिका–४ नगर अस्पताल भन्दा २ सय मिटर दक्षिण गुठीको जग्गा अतिक्रमण गरी पक्की घर निर्माण भइरहेको छ। सार्वजनिक सम्पत्तिको संरक्षण गर्ने जिम्मेवारी पाएका स्थानीय सरकार र सम्बन्धित निकायले देख्दादेख्दै पनि प्रभावकारी कदम नचालेको भन्दै स्थानीयवासीले प्रश्न उठाएका छन्।स्थानीय स्रोतका अनुसार नगर अस्पताल भन्दा २ सय मिटर दक्षिण करिब एक कठ्ठा गुठीको जग्गा अतिक्रमण गरी रातारात पक्की घर निर्माण भइरहेको छ। रातिको समयमा लुकीछिपी निर्माण कार्य हुने गरेको र यसमा ठेकेदारको समेत मिलेमतो रहेको स्रोतको दाबी छ। यद्यपि, उक्त आरोपको स्वतन्त्र पुष्टि हुन सकेको छैन।

गौशाला नगरपालिकाले अतिक्रमणमा परेका जग्गा संरक्षण गर्ने भन्दै सूचना जारी गर्दै आएको छ। तर, नगरपालिकाकै वडा क्षेत्रमा गुठीको जग्गा अतिक्रमण गरी घर निर्माण भइरहेको भनिँदा पनि नियन्त्रणका लागि ठोस पहल नदेखिएको स्थानीयवासीको गुनासो छ।

एक स्थानीयका अनुसार रातिको समयमा आर्थिक चलखेल र ठेकेदारको मिलेमतोमा घर निर्माण हुने गरेको छ। उनले गुठीको जग्गामा भइरहेको भनिएको अतिक्रमणबारे सम्बन्धित निकायले तत्काल छानबिन गरी सत्यतथ्य सार्वजनिक गर्नुपर्ने माग गरेका छन्। स्थानीयवासीका अनुसार उक्त क्षेत्रमा वर्षौंदेखि खाली रहेको गुठीको जग्गामा मनपरी ढंगले घर निर्माण हुँदै आएको छ। जग्गा खाली देखिनेबित्तिकै अतिक्रमण गरेर संरचना बनाउने क्रम जारी रहे पनि गुठी संस्थानले प्रभावकारी कदम नचालेको उनीहरूको आरोप छ।

गुठीको सम्पत्ति संरक्षण गर्ने दायित्व बोकेको संस्थान र स्थानीय सरकारको निष्क्रियताले अतिक्रमण गर्नेहरूलाई प्रोत्साहन मिलिरहेको त छैन भन्ने प्रश्नसमेत उठेको छ। अतिक्रमणको वास्तविक अवस्था, जग्गाको स्वामित्व र निर्माण भइरहेको संरचनाको वैधानिकताबारे सम्बन्धित निकायले स्पष्ट पार्नुपर्ने देखिन्छ।

यस विषयमा गुठी संस्थानका प्रवक्ता जनक पोखरेलले गुठीको जग्गा अतिक्रमण गर्न नपाइने स्पष्ट पार्दै त्यस्तो कार्य गर्नेलाई तत्काल कारबाहीको दायरामा ल्याइने जानकारी दिएका छन्। तर, प्रवक्ताको भनाइ र स्थानीयस्तरमा भइरहेको भनिएको अतिक्रमणबीच देखिएको अन्तरले संस्थानको प्रतिबद्धता कार्यान्वयनमा आउँछ कि आउँदैन भन्ने प्रश्न खडा गरेको छ।

अब सम्बन्धित निकायले जग्गाको स्थलगत निरीक्षण, स्वामित्वको यकिन, निर्माण कार्यको वैधानिकता जाँच तथा अतिक्रमण पुष्टि भए आवश्यक कानुनी कारबाही अघि बढाउनुपर्ने स्थानीयवासीको माग छ। गुठीको जग्गा संरक्षण गर्ने जिम्मेवारी भाषण र सूचनामा मात्र सीमित हुने कि व्यवहारमै देखिने भन्ने विषयमा सरोकारवालाको ध्यानाकर्षण भएको छ।