महोत्तरीको गौशालामा दस हजारभन्दा बढी कुमारी कन्याद्वारा भव्य कलश यात्रा

1 घन्टा पहिले प्रकाशित

(2083-06-25 B.S.)

38 पटक देखिएको

गुरिया यादव

महोत्तरी, असोज २५ गते । महोत्तरीको गौशाला बजारमा दुर्गा पूजाको अवसरमा दस हजारभन्दा बढी कुमारी कन्याको सहभागितामा भव्य कलश यात्रा निकालिएको छ। गौशाला बजारस्थित दुर्गा मन्दिरबाट सुरु भएको कलश यात्रा माण्डवी गङ्गामा कलशमा जल भरेर बजारको परिक्रमा गर्दै पुनः दुर्गा मन्दिरमा पुगेर सम्पन्न भएको हो।

कलश यात्रामा हजारौँ कुमारी कन्याको सहभागिता रहेको थियो। धार्मिक आस्था, परम्परा र सांस्कृतिक महत्त्व बोकेको यस यात्राले गौशालाको धार्मिक वातावरणलाई उल्लासमय बनाएको छ।

कलश यात्राको धार्मिक महत्त्वबारे जानकारी दिँदै दुर्गा मन्दिरका पूजारीले हिन्दु धर्ममा तिथिको विशेष महत्त्व रहेको बताए। उनका अनुसार चन्द्रमाको अवस्था तथा सूर्य र चन्द्रमाबीचको कोणीय दूरीका आधारमा तिथि निर्धारण गरिन्छ। प्रतिपदा, द्वितीया, तृतीया र चतुर्थीलगायतका तिथिहरू हिन्दु पञ्चाङ्गका महत्त्वपूर्ण एकाइ हुन्।

पूजारीका अनुसार गौशालामा दुर्गा पूजाको विशेष परम्परा रहेको छ। यहाँ नवरात्रको घटस्थापनादेखि नौ दिनसम्म विधिपूर्वक पूजा–आराधना गरिन्छ। प्रत्येक साँझ दुर्गा मन्दिरमा आरती गर्ने परम्परा छ। साँझको आरतीमा कुमारी कन्याहरू पनि सहभागी हुन्छन्।

आरतीपछि कन्याहरूले दीप प्रज्वलन गरी दुर्गा मातासँग आफ्नो मनोकामना पूरा होस् भन्दै प्रार्थना गर्ने परम्परा रहेको पूजारीले बताए। भक्तजनहरूले सुख, शान्ति, समृद्धि, राम्रो घरपरिवार तथा योग्य जीवनसाथी प्राप्तिको कामनासहित पूजा–आराधना गर्ने गरेका छन्।

सामान्यतया धेरै स्थानमा विजयादशमीका दिन दुर्गा भगवतीको मूर्ति विसर्जन गर्ने गरिन्छ। तर गौशालामा भने दुर्गा पूजाको उत्सव कोजाग्रत पूर्णिमासम्म धुमधामका साथ मनाउने विशेष परम्परा रहेको छ।

यस परम्पराले गौशालाको दुर्गा पूजालाई अन्य स्थानको तुलनामा फरक पहिचान दिएको छ। धार्मिक आस्था, स्थानीय संस्कृति र पुस्तौँदेखि चल्दै आएको परम्पराका कारण यहाँको दुर्गा पूजा स्थानीयवासीका लागि विशेष महत्त्वको पर्व बनेको छ।

स्थानीयवासीले दुर्गा माताको पूजा–आराधना गर्दै परिवारको सुख, शान्ति, समृद्धि र मनोकामना पूरा होस् भन्ने कामना गर्ने गरेका छन्।