ममता शर्मा

महोत्तरी , जेष्ठ ३२ गते

महोत्तरीको गौशालामा भएको शिक्षक सरुवामा राजनीति भएको भन्दै विद्यार्थीहरु आन्दोलित भएका छन् । बिहिबार गौशाला नगरपालिकाको कार्यालय परिसर स्थित रामनगर माध्यमिक विद्यालयका विद्यार्थीहरु आन्दोलित भएका छन् । शिक्षक सरुवा शिक्षक र राजनीतिक विषय भएपनि यसको चपेटामा रामनगर मा. वि. विद्यार्थी परेका छन् ।

कक्षा ८ , ९ र १० का विद्यार्थीहरु विद्यालयमा भएको शिक्षक हरुको सरुवा रोक्का हुनुपर्ने , विद्यालयमा  पुरानै शिक्षकहरुबाट पठनपाठन हुनुपर्ने माग राख्दै विद्यार्थीहरु आन्दोलित भएका छन् ।

आन्दोलनमा सहभागी विद्यार्थीहरुले ‘शिक्षामा राजनीति गर्न पाइदैन , गौशाला नगरपालिका मुर्दावाद , शिक्षा शाखा मुर्दावाद, शिक्षक सरुवा गर्न पाइदैन , विद्यार्थीको माग पुरा गर लगायतका नाराबाजी समेत गरेका थिए ।

विद्यालयमा मनस्थिति ठिक नभएको शिक्षक सरुवा भएर आउन लागेको थाहा पाएर शिक्षक सरुवाको विरोध गर्नु परेको आन्दोलनमा सहभागी विद्यार्थीले रोशन कुमार महतोले बताए । साथै उनले शिक्षक सरुवा रोक्का नभए सम्म आन्दोलन जारी राख्ने चेतावनी समेत दिए ।

यसरि शिक्षक र जनप्रतिनिधिले विद्यार्थीहरुलाई उक्साएर राजनीतिको चपेटामा पारेको एक स्थानीयले आपत्ति जनाएका छन् । उनले भने , ‘जुन शिक्षकबाट विद्यार्थीले पढेका पनि छैनन् ,उसको बारेमा यसरि मनस्थिति ठिक छैन भन्ने कुराले प्रस्ट भएको छ कि यहाँ विद्यार्थीलाई भ्रमित पारिएको छ । शिक्षकहरुले आफ्नो स्वार्थ पुरा गर्न यो सब गरिरहेको हो । तर यसरि विद्यार्थीलाई उक्साएर आन्दोलन गराउनुले शिक्षकको राजनीतिक गतिविधि झन् बढेको छ भनेर थाहा हुन्छ ।"

यस सम्बन्धमा आफ्नो प्रतिक्रिया दिदै गौशाला नगरपालिका वडा न. १ रामनगरका वडा अध्यक्ष नविन साहले शिक्षक सरुवा कुनै पनि सम्बन्धित व्यक्तिहरुको सहमति अनुसार नभएर नगर प्रमुख डा. दिपेन्द्र महतोले एकलौटी निर्णय गरेकोले यो समस्या सिर्जना भएको बताए । साथै शिक्षक सरुवा पारदर्शी समेत नभएकोले यसमा चरम राजनीति भएको उनले जिकिर गरे अध्यक्ष साहले शिक्षक सरुवा भएपनि सबैको सहमति ,उचित व्यवस्थापन र पारदर्शी तरिकाले भएमा मात्र उचित हुने बताए ।

आन्दोललित विद्यार्थी , वडा अध्यक्ष , उपमेयर मिलेर लगाएको ताल्चा करिब २ घण्टापछी नगर प्रमुख डा. महतोले ताल्चा तोडेर नगरपालिकाको कार्य संचालनमा ल्याएका थिए ।

नगर प्रमुख महतोले विद्यार्थीलाई उक्साएर आन्दोलन गर्न लगाउनु अपराध मात्र नभएर उनिहरुको भविष्यको संग खेलवाड गर्नु रहेको बताए । उनले भने , ‘ यो विद्यार्थीको आन्दोलन होइन ।यो शिक्षक र जनप्रतिनिधिबीचको विभेद विचारको आन्दोलन हो । यसमा विद्यार्थी संलग्न गराउनु गलत हो । त्यसैले यसको म घोर विरोध गर्दछु र कानुनी प्रक्रियामा गएर मानहानीको मुद्धा हाल्छु ।"

गौशला नगरपालिकामा शिक्षक सरुवा विवादित बनेको छ ।  गौशला नगरपालिकामा अवस्थित सामुदायिक विद्यालयमा कार्यरत रहेका शिक्षहरुको गत जेठ  ३ गते वुधबार काज सरुवा गरिएको हो । नगर प्रमुख डा. दिपेन्द्र महतोले गुणस्तर शिक्षाका निम्ति गरेको शिक्षक सरुवा अहिले विवादित बनेको छ ।