गौशालामा दलित तथा विपन्न महिलाहरुलाई उद्यम व्यवसाय सुरुवात तथा सुधार तालिम सम्पन्न

6 दिन पहिले प्रकाशित

(2082-04-09 B.S.)

31 पटक देखिएको

महोत्तरी, साउन ९ गते ।

महोत्तरीको गौशालामा दलित तथा विपन्न समुदायका महिलाहरुलाई लक्षित गरी सात दिने सुक्ष्म उद्यम व्यवसाय सुरुवात तथा सुधार तालिम सम्पन्न भएको छ। सामुदायिक विकास पैरवी मंच नेपाल, बर्दिवासको आयोजनामा, सेभ द चिल्ड्रेनको सहयोग र गौशाला नगरपालिकाको समन्वयमा उक्त तालिम सञ्चालन गरिएको हो।

गौशाला–७ मनहर्वाका दलित तथा विपन्न समुदायका २३ महिला र बर्दिवासका आएका १५ महिलाको सहभागिता रहेको उक्त तालिमले महिला उद्यमीहरूलाई व्यापार–व्यवसाय सुरु गर्ने र पहिलेबाट सञ्चालनमा रहेका स-साना व्यवसाय सुधार गर्न हौसला प्रदान गरेको आयोजकहरूले जनाएका छन्।

सामुदायिक विकास पैरवी मंच नेपाल, बर्दिवासका उपाध्यक्ष सोम बहादुर कार्कीका अनुसार, “तालिमले महिलाहरूलाई व्यवसायिक सोच बनाउने, योजना बनाउने र बजारमा प्रतिस्पर्धा गर्न सक्ने क्षमता विकासमा सहयोग पुर्‍याएको छ।” उनले थपे, “साथै, तालिममा सहभागी महिलाहरुलाई उनीहरुले सुरु गरेका साना व्यवसायको विकास र विस्तारका लागि आवश्यक मार्गदर्शनसमेत दिइएको छ।”

तालिममा प्रशिक्षकको भूमिका प्रेम बहादुर महतले निर्वाह गरेका थिए।

उक्त तालिमले दलित तथा विपन्न वर्गका महिलाहरूलाई आत्मनिर्भर बनाउने दिशामा महत्वपूर्ण योगदान पुर्‍याउने विश्वास आयोजक संस्थाको रहेको छ।