पीडितको घरमै पुगेर उम्मेदवार महतोको मानवीय पहल

2 महीना पहिले प्रकाशित

(2082-10-13 B.S.)

346 पटक देखिएको

महोत्तरी ,माघ १३ गते ।

भ्रष्टाचारको अन्त्य र जनताको प्रत्यक्ष सेवा गर्ने प्रतिबद्धतासहित महोत्तरी क्षेत्र नम्बर–१ बाट जनमत पार्टीका उम्मेदवार बिरेन्द्र महतोले जनसमुदायमा आफ्नो धर्ना सार्वजनिक गर्नुभएको छ।

मंगलबार महतो गौशाला नगरपालिका वडा नम्बर–२ मा पुगेर बोन म्यारो रोगबाट पीडित नितेश पासवानको घरमै पुग्नुभयो। नितेश, स्थानीय ज्ञानी पासवानका छोरा हुन्, जो केही दिनदेखि गम्भीर रोगसँग संघर्ष गरिरहेका छन्।

पीडित परिवारले उपचारका लागि ठूलो खर्च लाग्ने भए पनि आफ्नो आर्थिक अवस्था कमजोर भएकाले उपचार गर्न असमर्थ रहेको जानकारी गराएपछि उम्मेदवार महतो भावुक देखिनु भयो। उहाँले तत्काल उपचार खर्चका लागि व्यक्तिगत रूपमा केही आर्थिक सहयोग गर्ने घोषणा गर्नुभयो।

त्यसैगरी, निर्वाचनमा विजयी भएमा यस्तो व्यक्तिहरुलाई सम्पूर्ण उपचार निःशुल्क गरिने नीति लागू गर्ने प्रतिबद्धता जनाउनुभयो। “गरिब भएर कोही पनि उपचारबाट वञ्चित हुन नपरोस्, यही मेरो राजनीतिक संकल्प हो,” महतोले भन्नुभयो।

उम्मेदवार महतोले मधेश प्रदेशमा सबै सुविधा सम्पन्न, आधुनिक र सर्वसाधारणमैत्री अस्पताल स्थापना गर्नु अत्यावश्यक रहेको उल्लेख गर्नुभयो। उहाँका अनुसार हालको स्वास्थ्य संरचनाले गरिब, असहाय र निमुखा जनताको आवश्यकता पूरा गर्न सकेको छैन।

यस अवसरमा उहाँले सरकार जनताबाट टाढा नभई असहाय, गरिब र पीडित जनताको पीडामा साथ दिनुपर्ने धारणा व्यक्त गर्नुभयो। स्थानीयवासीहरूले उम्मेदवार महतोको कदमलाई मानवीय र उदाहरणीय भन्दै प्रशंसा गरेका छन्।