सर्लाहीमा युवकलाई नांगो बनाएर कुटपिट, एक पक्राउ

30 दिन पहिले प्रकाशित

(2082-12-03 B.S.)

77 पटक देखिएको

सर्लाही, चैत्र ३ गते ।

सर्लाहीमा एक युवकलाई नांगो बनाएर अमानवीय रूपमा कुटपिट गरिएको घटनामा प्रहरीले एक जनालाई पक्राउ गरेको छ। यो घटना सर्लाहीको कबिलासी नगरपालिका–१० स्थित चमेलीमाई पछाडिको एक फन पार्कमा गत फागुन २३ गते अपराह्न करिब ४ बजे भएको हो।

घटनामा चक्रघट्टा गाउँपालिका–९ निवासी १९ वर्षीय प्रमित कुमार यादवमाथि समूहले निर्घात कुटपिट गरेको आरोप छ। घटनाको भिडियो सामाजिक सञ्जालमा भाइरल भएपछि मात्र यो विषय सार्वजनिक भएको हो।

प्रहरीका अनुसार फागुन २९ गते राजेन कुमार यादवले रोहित कुमार यादवसहितका व्यक्तिविरुद्ध ज्यान मार्ने उद्योग, अपमानजनक तथा अमानवीय व्यवहार, कुटपिट तथा अंगभंगसम्बन्धी कसुरमा जिल्ला प्रहरी कार्यालय सर्लाहीमा जाहेरी दर्ता गरेका थिए। सोही दिन मुख्य आरोपितमध्येका रोहित कुमार यादवलाई प्रहरीले पक्राउ गरेको हो।

हाल उनलाई जिल्ला अदालतबाट पाँच दिनको म्याद थप गरी हिरासतमा राखिएको छ र घटनाबारे थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।

सामाजिक सञ्जालमा फैलिएको भिडियोमा केही व्यक्तिहरूले प्रमितलाई नांगो बनाएर चिर्पट लगायतका वस्तुले कुटपिट गरिरहेको देखिन्छ। कुटपिटका क्रममा पीडितले ‘बाबु हो, बाबु’ भन्दै गुहार मागिरहेको सुनिन्छ। भिडियोमा वरपर रहेका अन्य व्यक्तिहरूले हस्तक्षेप नगरेको दृश्य पनि देखिन्छ, जसले घटनाको क्रूरता थप स्पष्ट पार्छ।

प्रहरीले घटनाको कारणबारे विस्तृत विवरण आउन बाँकी रहेको जनाएको छ। प्रारम्भिक अनुसन्धान अनुसार सामान्य विवाद र गालीगलौजबाट झगडा सुरु भएको हुन सक्ने अनुमान गरिएको छ।

घटनामा संलग्न अन्य व्यक्तिहरूको खोजी कार्य तीव्र बनाइएको प्रहरीले जनाएको छ। साथै, आवश्यक विवरण क्रमशः सार्वजनिक गरिने पनि सर्लाही प्रहरीले जानकारी दिएको छ।