असार २३, रौतहट

उपेन्द्र गोले 

रौतहटमा निर्माण सम्पन्न भएको २ महिनामै कालोपत्रे फुट्न थालेको छ । रौतहटको कटहरिया नगरपालिकाको बालुवादेखि देवाही गोनाहीसम्मको सडकखण्ड निर्माण गरेको ४ महिना पुग्न नपाउदै विभिन्न स्थानमा कालोपत्रे फुटेको छ ।

मुन्ना निर्माण सेवाका सञ्चालक प्रमोद यादवले गुणस्तरहीन काम गरेका कारण सो कालोपत्रे केही महिनामा नै फुट्न थालेको स्थानियले बताएका छन । सडक डिभिजन कार्यालय चन्द्रनिगाहपुर , सहरी विकास तथा स्थानीय तह लगायतका विभिन्न निकायबाट हुने टेन्डर प्रमोद यादव लगायतका ठेकेदारले ५० प्रतिशतभन्दा कममा निर्माण कार्यको ठेक्का साकार गरेको जनाइएको छ ।

डिभिजन सडक कार्यालय चन्द्रनिगाहपुरको ग्यारेन्टी अवधिमा नै रौतहटको बलुवा गोनाही कालोपत्रे ठाउँ–ठाउँमा फुट्न थालेको स्थानियले बताएका छन । मुन्ना निर्माण सेवाका सञ्चालक प्रमोद यादवले २ करोड ७२ लाखमा बलुवादेखि गोनाही सम्मको दुई फेजमा २३ सय ६० मिटर कालोपत्रे गर्ने टेन्डर साकार गरेका थिए ।

ठेकदार यादवले ठेक्का लिएको उक्त कालोपत्रे निर्माण पूरा गरेर २ महिना अघि डिभिजन सडक कार्यालय चन्द्रनिगाहपुरलाई हस्तान्तरण गरेका हो । कालोपत्रे गरेको ४ महिना नबित्दै बलुवा गोनाही सडक खण्ड अन्तर्गतको सो कालोपत्रे झन्डै १० स्थानमा फुटेको र अधिकांश स्थानमा कालोपत्रे धसेको स्थानियले बताएका छन ।

कालोपत्रे सम्पन्न सडकखण्डको गोनाही गाउँ छेउ, उचिडि भन्दा दक्षिण र उत्तरको सडकखण्डका ठाउँ ठाउँमा कालोपत्रे फुटेको स्थानियले जनाएका छन । ठेकदार प्रमोद यादवले कालोपत्रे गर्नुअघि ग्राभेल राम्ररी नपेलेको , रोलर कम चलाएको तथा कालोपत्रे मापदण्ड भन्दा कम प्रयोग गरेकाले वर्षा सुरु हुनुअघि नै कालोपत्रे फुटेको र ठाउँ ठाउँमा कालोपत्रे धसेको स्थानीय युवा रुपेश पटेलको भनाइ रहेको छ ।

कालोपत्रे स्तरीय भएको र ट्याक्टर आवतजावतले फुट्न थालेको ठेकदार यादवका एक प्रतिनिधिले प्रतिक्रिया दिएका छन । डिभिजन सडक कार्यालय चन्द्रनिगाहपुरका प्रमुख रामनरेस केसरीले उक्त कालोपत्रेको एक वर्ष ग्यारेन्टी अवधि रहेकाले मुन्ना निर्माण सेवाको धरौटी रोक्का रहेको बताउनु भयो ।

ग्यारेन्टी अवधिमा कालोपत्रे फुटेमा धसेमा पुरानै ठेक्काको रकमबाट ठेकेदारले फेरि सडक निर्माण गर्नुपर्ने कानुनी व्यवस्था रहेको प्रमुख केसरीले बताउनु भयो ।

ठेकदार प्रमोद यादवले सम्पन्न गरेको कालोपत्रे बलुवादेखि गोनाही सम्मको सडकको आवश्यक जाँचबुझ हुने र गुणस्तरहीन ठहर भएमा कानुन बमोजिम कारबाहीको प्रक्रिया अगाडि बढ्ने डिभिजन सडक चन्द्रनिगाहपुरका प्रमुख रामनरेस केसरीले प्रतिबद्धता गर्नुभयो ।