जनकपुरधामको खानेपानीका हाकिमलाई अर्धनग्न पारेर घुमाए जनमत पार्टीका कार्यकर्ताहरुले

5 वर्ष पहिले प्रकाशित

(2078-07-04 B.S.)

5080 पटक देखिएको

कार्तिक ४

जनकपुरधामको खानेपानीका हाकिम राजेश्वर कुशवाहालाइ डा. सिके राउत नेतृत्वको जनमत पार्टीका कार्यकर्ताहरुले अर्धनग्न पारेर घुमाएका छन् ।

सीके राउत नेतृत्वको जनमत पार्टीका कार्यकर्ताले नेपाल खानेपानी संस्थान जनकपुरधामका निमित्त प्रमुखलाई कुटपिट गर्दै नगर घुमाएका छन्। जनकपुरधाम धेरै बर्षाको कारण जलमग्न भएपछि ढल निर्माणमा अनियमितता भएको भन्दै यस्तो गरेको जनाइएको छ ।

केहि दिन अगाडी परेको दुई दिनको वर्षामा पानीको निकास ढल भएर बग्न नसकेपछि जनमत पार्टीका नेताकार्यकर्ताले नेपाल खानेपानी संस्थान जनकपुरधामका निमित्त प्रमुख राजेश्वर कुश्वाहालाई कुटपिट गर्दै नगर परिक्रमा गराएका हुन्। पार्टीका दर्जनौं कार्यकर्ताले कुश्वाहालाई जबरजस्ती जनकपुरधामको रामानन्द चोकस्थित रहेको खानेपानीको कार्यालयबाट बाहिर निकालेर कुटपिट गर्दै नगरको परिक्रमा गराएका हुन् ।

प्रमुखलाई कुटपिट गर्दै कपडा च्यातेर र जिउभरि नालाको हिलो दलेर नगर परिक्रमा गराउदा प्रहरी प्रशासन भने मुकदर्शक बनेका थिए । ढल निकासको उचित व्यवस्थापनको लागि जनमत पार्टीले खानेपानी सँस्थानमा पटक पटक ज्ञापन पत्र बुझाउँदै आएको थियो ।व्यवस्थापन नभएपछी जनमत पार्टीका कार्यकर्ताहरुले खानेपानी सँस्थानमा तालाबन्दी समेत गरेका थिए ।

यति हुदाँ पनि प्रमुख कुशवाहाले विहिबार जनमत पार्टीका कार्यकर्ताहरुले जनकपुरमा ढल निकासको उचीत व्यवस्थापनको लागि योजनाको बारेमा सोध्न गएपछि उनीहरुसँग चर्को स्वरमा बोलेपनि प्रमुख कुश्वाहालाई समातेर नगर परिक्रमा गराएको हो ।

यस सम्बन्धि समाजिक संजालमा सकारात्मक र नकारात्मक दुवै आलोचना भईरहेका छन् ।