गौशाला बजारमा दिपावलीको रौनक

5 वर्ष पहिले प्रकाशित

(2078-07-18 B.S.)

3654 पटक देखिएको

कार्तिक १८ , गौशाला

महोत्तरीको गौशाला नगरपालिका वडा न . ५ गौशाला बजार स्थित आज दिपावलीको रौनक छाएको छ । तिहारको तेस्रो दिन आज महोत्तरीको मुख्य व्यापारिक केन्द्रको रुपमा रहेको गौशाला बजारमा लक्ष्मी पुजाको अवसरमा किनमेल गर्नेहरुको भिडभाड बढेको पाईएको छ ।

बजारमा पुजाको लागि विभिन्न सरसामग्री तथा नजिकिदै गएको पर्व छठको लागि सामग्री किन्नेहरुको घुइचो लागेको छ । त्यसै गरि छठ पर्वको लागि अत्यावश्यक केरा बिक्रि वितरण गर्ने र किन्ने गरेको पनि देखिएको छ ।

लक्ष्मी पूजा गरिने कार्तिक कृष्ण औँसीको रातलाई सुखरात्रि पनि भनिन्छ । वर्षभर मनाइने चार प्रमुख रात्रिमध्ये यो पनि एक हो । लक्ष्मी पूजाका लागि आज साँझ आँगनदेखि मूलढोका हुँदै लक्ष्मी स्थापना गरी पूजा गर्ने कोठासम्म गाईको गोबर र रातोमाटोले लिपपोत गरेर चामलको पीठो र अबीरले लक्ष्मीको पाइला बनाई लक्ष्मी आउने बाटो देखाइन्छ ।

पाइलैपिच्छे केराको सुत्लो अथवा माटाको पालामा दीप प्रज्ज्वलन गरी झिलीमिली बनाइन्छ । हाल पालामा दियोको स्थानमा मैनबत्ती बाल्ने प्रचलन पनि बढ्न थालेको छ ।

दियोमा तेल राखेर बत्ती बाल्नु नै वैदिक परम्परा भएको धर्मशास्त्रविद् प्रा.डा रामचन्द्र गौतमले बताए ।दीपावली गरिसकेपछि पूजा कोठामा दियो, कलश र गणेशसहित लक्ष्मी स्थापना गरेर गरगहना, पैसा, धान, चामल, फलफूल, सेलरोटी र फूलमाला चढाई विधिपूर्वक लक्ष्मीको पूजा आराधना गरिन्छ ।लक्ष्मीपूजा पछि कन्या केटी र छोरी चेलीलाई लक्ष्मीको प्रतीक मानी पूजा गरी दक्षिणासमेत दिने प्रचलन छ ।

आज घरमा लक्ष्मीपूजा गरेपछि धनदौलत वा अन्य सामान घरबाहिर पठाए लक्ष्मी बाहिर जान्छिन् भन्ने धार्मिक विश्वास छ । कुल परम्पराअनुसार कतै आजै बिहान गाईको पूजा गर्ने प्रचलनसमेत छ ।