स्वास्थ्य स्वयंसेविका दिवसको अवसरमा अन्तरक्रिया कार्यक्रम सम्पन्न

5 वर्ष पहिले प्रकाशित

(2078-08-19 B.S.)

2834 पटक देखिएको

मनिषा शर्मा ।
महोत्तरीको गौशाला नगरपालिका वडा न.५ स्थित पुरानो नगर कार्यपालिकाको कार्यालयमा १८ औ राष्ट्रिय महिला सामुदायिक स्वास्थ्य स्वयंसेविका दिवसको अवसरमा अन्तरक्रिया कार्यक्रम सम्पन्न भएको छ ।

गौशाला नगरपालिका स्वास्थ्य शाखाद्वारा आयोजित तथा नगर प्रमुख शिवनाथ महतोको अध्यक्षतामा सम्पन्न उक्त कार्यक्रममा नगरका सम्पूणर् वडाका स्वयंसेविकाहरु , स्वास्थ्य शाखा प्रमुख राम प्रगास महतो,न.पा. का जनस्वास्थ्य निरीक्षक मनोज कुमार सिंह लगायतको उपस्थिति रहेको थियो ।
“स्वस्थ जीवन शैली हाम्रो आवश्यकता ,संकट न्यूनीकरणमा महिला सामुदायिक स्वास्थ्य स्वयंसेविका“ नाराका साथ स्वास्थ्य स्वयंसेविका दिवस कार्यक्रम मनाइएको छ । कार्यक्रममा स्वास्थ्य स्वयंसेविकाहरुले भोग्नुपरेको समस्या ,चुनौतीहरुको बारेमा छलफल गरिएको छ । स्वास्थ्य स्वयंसेविकाको समाजमा निकै महत्व हुने भएकोले नगरको सामुदायिक समुन्नतिको लागि स्वास्थ्य स्वयंसेविका अपरिहार्य रहेको स्वास्थ्य शाखा प्रमुख राम प्रगास महतोले बताएका छन् ।

उनले स्वास्थ्य स्वयंसेविकाले सामना गर्दै गरेका समस्याहरुलाई छिटै स्थानीय सरकारद्वारा समाधानको बाटोमा लागि सहजीकरण गर्ने प्रतिबद्धता व्यक्त गरेका छन् ।