महिला हिंसा अन्त्य गर्न स्वयम् आफ्नै सोच हिंसामुक्त गर्नु आवश्यक : आशा लामा

5 वर्ष पहिले प्रकाशित

(2078-08-20 B.S.)

3422 पटक देखिएको

ममता शर्मा ।

महोत्तरीको गौशाला नगरपालिकाका उपप्रमुख आशा लामाले हिँसा अन्त्य गर्नको लागि आफ्नो सोचमा परिवर्तन गर्नुपर्ने बताउनुभएको छ । उहाँले आफ्नो व्यक्तिगत स्तरबाट नै सुरुवात गरे मात्र परिवार ,समाज र राष्ट्रमा हिंसा अन्त्य हुने बताउनुभएको छ । गौशाला नगरपालिका वडा न.२ निगौल स्थित रहेको निगौल मा.वि. मा नगरपालिकाद्वारा आयोजित लैङ्गिक हिंसा विरुद्धको १६ दिने अभियान अन्तर्गत १२ औ दिनको कार्यक्रममा उहाँले यस्तो बताउनु भएको हो । उहाँले भन्नु भयो ,"महिला भएकै कारण हुने विभेदका परिणाम स्वरुप महिलामाथि हुने हिंसाले निरन्तरता पाएको छ ,यसको अन्त्य गर्न महिलाले आफ्नो स्वपहिचानका साथ समाजका गतिविधिमा अगाडी बढ्नुपर्छ ।"

स्थानीय सरकारले मात्र नभएर यसमा समाजका व्यक्तिहरुले स्वयम् आफैमा हिंसा नहुने तथा गर्न नदिने अडान लिई प्रतिबद्ध भएमा मात्र यसको उन्मुलन गर्न सकिनेमा उहाँले जोड दिनु भएको छ ।

सोमबार विद्यालयको प्रांगणमा गौशाला नगरपालिका वडा न.२ को अध्यक्ष शेष सलामको अध्यक्षतामा सम्पन्न भएको उक्त कार्यक्रममा उपप्रमुख आशा लामा ,नगरपालिका सामाजिक सुरक्षा विकास शाखा प्रमुख अस्मिता शर्मा ,न्यायिक समितिका कर्मचारी प्रकाश महरा ,विद्यालयका प्रधानाध्यापक ,शिक्षक विनय सिंह लगायत विभिन्न शिक्षक शिक्षिका तथा विद्यार्थीहरुको सहभागिता रहेको थियो ।

कार्यक्रममा लैङ्गिक हिंसा अभियान सफल गर्नको विद्यालय स्तरबाट विद्यार्थीहरुमा चेतना विकास हुनुपर्ने अधिकांश वक्ताहरुले जोड दिएका छन् ।

हिंसा जानेर वा नजानेर पनि समाज तथा परिवारमा हुदै आइरहेको बताउदै विद्यालयका शिक्षक विनय सिंहले हिंसालाइ सम्झौताको रुपमा नलिएर त्यसको विरुद्धमा आवाज स्वत उठाउनुपर्नेमा जोड दिनुभएको छ ।

साक्षरताको प्रभावले मात्र महिला हिंसा मुक्त हुन सक्छ र यसको बारेमा बुझेर सम्बन्धित ठाउँमा आफ्नो आवाज बुलन्द गर्न सकेमा हिंसाको स्वरूप समाजबाट र परिवारबाट कम गर्न सकिने उहाँले बताउनु भएको छ ।

लैङ्गिक हिंसा विरुद्धको १६ दिने अभियानको १२ औ दिनको कार्यक्रम सोहि दिन गौशाला नगरपालिका वडा न.३ नवराजपुर स्थित पनि नगरपालिकाद्वारा संचालन गरिएको थियो जसमा समाजका महिलाहरुको बिशेष सहभागिता रहेको थियो ।