गौशालामा बाक्लो हुसु तथा सित लहर सुरु,विपन्न बढी प्रभावित

5 वर्ष पहिले प्रकाशित

(2078-09-15 B.S.)

4010 पटक देखिएको

महोत्तरीमा आज बाट बाक्लो हुसु तथा सित लहर सुरु भएको छ । जिल्लाको गौशाला नगरपालिका लगायत अन्य क्षेत्रमा मध्य पुसबाट बढेको चिसोले न्यानो कपडा र ओढ्नेओछ्याउने नभएका अतिविपन्न, मुसहर, डोम, चमार लगायतका पिछडिएको दलित परिवार सबैभन्दा बढी प्रभावित भएका छन् ।

ज्याला मजदुरी गरेर खानेसँग शरीर ढाक्ने न्यानो कपडा र राती सुत्दा ओढ्ने ओछ्याउने नरहेको समस्या पनि सिर्जना भएको छ । कठ्याङ्ग्रिदो जाडो र चिसो स्याँठले गर्दा मानिसहरुलाई घरबाहिर निस्कनै समस्या पर्न थालेको छ ।

विद्यार्थीहरुलाई विद्यालय जान पनि मुस्किल परिरहेको छ । बालबालिका, अशक्त र शारीरिक रुपमा कमजोर रहेका व्यक्तिहरुलाई चिसोले झनै सताएको छ । जिल्लाका स्थानीय तह र अन्य सरोकारवाला निकायहरुले अहिलेसम्म सर्वसाधारण नागरिकलाई चिसोबाट जोगाउन कुनै पहल गरेका छैनन् ।

अघिल्ला वर्षहरुमा गाउँपालिका तथा नगरपालिकाहरुले जिल्ला वन कार्यालयसँग समन्वय गरेर दाउरा वितरण गर्ने गरेको भएपनि यस वर्ष अहिलेसम्म कुनै पनि स्थानीय तहले दाउराको प्रवन्ध मिलाएका छैनन् ।

चिसो बढ्दै गएकाले यो समयमा पर्याप्त तातो र ताजा खानेकुरा खान, शरीरमा हावा पस्न नदिने गरी ताता लुगा लगाउन र अत्यावश्यक काम बाहेक घरबाहिर ननिस्कन चिकित्सकहरुले सुझाव दिनुभएको छ ।