सम्बन्ध पुरै विच्छेद गर्ने चेतावनी

2 वर्ष पहिले प्रकाशित

(2078-09-15 B.S.)

7617 पटक देखिएको

पुष १६

रुसी राष्ट्रपति भ्लादिमिर पुटिनले युक्रेनको विषयलाई लिएर रुसमाथि नयाँ नाकाबन्दी लगाइए अमेरिकासंगको सम्बन्ध पुरै विच्छेद हुने चेतावनी दिनुभएको छ ।

अमेरिकी राष्ट्रपति जो बाइडेनसँग हिजो भएको टेलिफोन कुराकानीमा पुटिनले त्यस्तो कदम भयंकर गल्ती हुने बताउनु भएको क्रेमलिनका प्रवक्ताले जनाएका छन् । तर बाइडेनसंगको संवाद सन्तोषपूर्ण रहेको पनि क्रेमलिनका प्रवक्ता युरी युसाकोभको भनाइ छ ।

५० मिनेट लामो टेलिफोन संवादका क्रममा अमेरिकी राष्ट्रपति बाइडेनले युक्रेनमाथि आक्रमण भएमा अमेरिका र उसका सहयात्री देशहरुले निर्णायक जवाफ दिने बताउनु भएको थियो । युक्रेनको पूर्वी सिमा क्षेत्रमा रुसले १ लाख बढी सेना तैनाथ गरेपछि रुस र अमेरिकासहित पश्चिमा मुलुकहरुबीच तनाव चर्किदै गएको छ ।

रुसले भने युक्रेनमाथि आक्रमण गर्ने कुनै योजना नरहेको भन्दै आफ्नो भूमि रक्षाका लागि युक्रेनको सिमानामा सेना तैनाथ गरेको तर्क गर्दै आएको छ । बाइडेन र पुटिनबीचको कुराकानी निकै गम्भीर र अर्थपूर्ण देखिएको अमेरिकी अधिकारीहरुले बताएका छन् ।

कुराकानीपछि ह्वाइटहाउसका प्रेस सचिव जेन पास्कीले तनाव कम गर्न रुसले के गर्छ भन्ने विषयले अगाडिको बाटो निर्धारण गर्ने बताएका छन् । दुई देशका अधिकारीहरुबीच आगामी महिना जेनेभामा प्रत्यक्ष कुराकानी गर्ने तयारी पनि भईरहेको छ ।