गौशाला बजारमा फोहोरमै व्यापार गर्न बाध्य व्यापारी

4 वर्ष पहिले प्रकाशित

(2078-09-19 B.S.)

5029 पटक देखिएको

निरन्जन साह

पुष १९

महोत्तरीको गौशाला नगरपालिका स्थित गौशाला बजारमा उत्पन्न विभिन्न किसिमका समस्याहरुको कारणले गर्दा व्यापारीहरु फोहोर मै व्यापार गर्न बाध्य भएका छन् । ठाउ वा स्थान उचित तरिकाले व्यवस्थापन हुन नसक्दा हिलो मैलो मै माछा ,कुखुरा तथा खसी बजार लागेको देखिएको छ । जनसमुदायले उक्त ठाउमा व्यापार गर्नको लागि कर तिरे पनि सो बमोजिमको सुबिधा पाउनबाट बन्चित छन् ।

बजार उचित तरिकाले व्यवस्थापन हुन नसक्दा बाटोको हिलो तथा फोहरमै बसेर आफ्नो व्यापार गर्न बाध्य छन् । गौशाला -४ निवासी बलदेव सहनी यस सम्बन्धि गुनासो गर्दै उनि भन्छन, "हामी यो एकदमै दुर्गन्धित ठाउँमा बस्न बाध्य छौ । के गर्नु उद्योग वाणिज्य संघलाइ पटक पटक गुनासो गरेपनि कुनै किसिमको पहल भएको छैन । स्थानीय सरकारलाइ केहि मतलब नै छैन यहाँको । यो हिलोमा बालुवा हालेर सरसफाई गरि व्यवस्थित गर्न सकिन्छ तर स्थानीय सरकारलाइ व्यापारीको कर संग मात्र मतलब छ । हामी महँगो दरमा कर तिरेपनि दुख र कष्ट झेल्न बाध्य छौ ।

फोहोरमैला र ठाउँ मात्र नभएर सवारी साधन राख्न पनि कुनै व्यवस्थापन हुन नसकेको अर्का एक व्यापारीले गुनासो गरेका छन् । बजारलाइ व्यवस्थापन गर्न लाखौको बजेट आएपनि सो बजेट बजारको लागि उपयोग नभएर जनप्रतिनिधि समक्ष मात्र सिमित रहन्छ ।

बजारलाई उचित तरिकाले व्यवस्थापन गर्नु प्रमुख दायित्व उद्योग वाणिज्य संघ र स्थानीय सरकारको हो तर यसमा कोहि पनि सक्रिय भएका छैनन् । सम्पूर्ण जिम्मा नगरपालिकाको हो भन्दै गैरजिम्मेवार सरह जवाफ दिदै गौशाला उद्योग वाणिज्य संघका सचिवले भने ,हामीले मात्र के गर्न सक्छौ र यो व्यवस्थापन गर्ने काम नगरपालिकाको हो । हामीले त सहकार्य मात्र गर्ने हो । हामीले यसको लागि स्थानीय सरकार समक्ष पहल गरेपनि कुनै किसिमको कार्य अगाडी बढेको छैन । यसमा हाम्रो केहि दोष छैन ।