काव्या अस्पतालमा आमासहित जुमल्याहा शिशुको मृत्यु

समाज मधेश प्रदेश मुख्य समाचार

5 वर्ष पहिले प्रकाशित

(2078-10-26 B.S.)

2268 पटक देखिएको

राजन झा

जनकपुरधाम, माघ २६ गते ।

अस्पतालको लापरवाहीले जनकपुरधाममा आमा र नवजात शिशुको मृत्यु भएको पिडित परिवारले आरोप लगाएका छन् ।

जनकपुरधाम स्थित काव्या अस्पतालमा चिकित्सकको लापरवाहीका कारण आमासहित जुमल्याहा शिशुको मृत्यु भएको भन्दै पिडित परिवारजनले अस्पतालमा तोडफोड समेत गरेका हुन् । गत सोमबार अस्पतालमा भर्ना भएकी धनुषाको धनुषाधाम नगरपालिका–७ किसानपुरका यैजुब अन्सारीकी २५ वर्षीया श्रीमती मुर्सरफ खातुन र उनका नवजात जुमल्याहा शिशुको ज्यान गएको छ ।

मृतकका परिवारजनले चिकित्सकको लापरबाहीले बिरामी र शिशुको मृत्यु भएको आरोप लगाएका छन् । डाक्टरहरु मुकेश गामी, सोनिया सिंह र विनय महासेठले अप्रेसन गरेर निकालेका शिशुमध्ये एकको गर्भमै मृत्यु भईसकेको र अर्का शिशुलाई भेन्टिलेटरमा राखिएको थियो । तर, केही घण्टामै अर्को शिशुको पनि मृत्यु भएको थियो । मृतकका श्रीमान यैजुबले अस्पतालमा चिकित्सकले शिशुलाई बचाउन नसकेपनि आमा निको हुने भन्दै उपचार जारी राखेपनि बुधबार बिहान महिलाको मृत्यु भएको आरोप लगाए ।

यता, काव्या अस्पताल प्रशासनले महिला भर्ना भएकै दिनदेखि प्लेटलेटको मात्रा कम भएकोले अस्पतालकै चिकित्सक डा. रमित राजलगायत अन्य कर्मचारीहरु मिलेर ६/७ पोका रगत दिई उनलाई बचाउने कोशिस गरेको दावी गरेका छन् । अस्पतालका सञ्चालक डाक्टर एस.के. सिंहले बिरामीको मृत्युको कारण अप्रेसन नरहेको दावी गरे । उनले एक शिशु मृत्यु भएकै अवस्थामा निकालिएको र अर्कोलाई बचाउनका लागि भेन्टिलेटरमा राखेर हरेक उपाय अवलम्बन गरिएको दावी गरे ।

महिलाको अवस्था क्रिटिकल हुन लाग्दा आफूहरुले बाहिर लग्न परिवारजनलाई जानकारी गराईसक्दा समेत उनीहरुले यहाँ नै उपचार जारी राख्न भनेपछि अस्पतालले उपचारको हरेक प्रयास गरेको डा. सिंहले बताए । तर मृतकका श्रीमानले भने चिकित्सकहरुको लापरवाहीको कारण श्रीमती र नवजात शिशुहरुको मृत्यु भएको दाबी गरेका छन् ।