गौशालामा छुरा हानी ५ लाख लुटेको घटनाको खुल्यो रहस्य

4 वर्ष पहिले प्रकाशित

(2079-04-14 B.S.)

8710 पटक देखिएको

गौशाला ,श्रावण १४

महोत्तरीको गौशालामा छुरा प्रहार गरि ५ लाख लुटेको घटनाको रहस्य खुलेको छ ।

रामगोपालपुर नगरपालिका ७ ससौला निवासी र मा वैष्णवी रेमिटेन्सका संचालक समेत रहेका अरुण चौधरीको हिजो शुक्रबार साझ ५ बजेतिर औरही ,बर्दिबास ,गौशाला हुदै घर गईरहेको क्रममा गौशाला नगरपालिका वडा न.२ रेडक्रस भन्दा २ सय मिटर दक्षिण सडकमा छुरा प्रहार गरि ५ लाख लुटेको घटना सार्वजनिक भएको थियो । इलाका प्रहरी कार्यालय गौशालाले घटनाको वास्तविकता २४ घण्टा भित्र अनुसन्धान गरि पत्ता लगाएको छ ।

अरुण चौधरीले चलाउदै आइरहेको रेमिटान्समा रहेको सर्वसाधारणको पैसा बैंकमा जम्मा गर्न औरही ,बर्दिवास , गौशालाको बैंकमा गएका थिए तर उनको घरको आर्थिक अवस्था कमजोर भएको कारणले र सर्वसाधारणको पैसा हिनामिना गर्ने उद्देश्यले आफै साजिस रचेर ५ लाख लुटपाट भएको जस्तो देखाईएको प्रहरीको अनुसन्धानबाट खुलेको हो ।

चौधरीले घर फर्किदै रहेको क्रममा खुट्टामा आफै छुरा हानी ५ लाख लुटियो भनेर हल्ला गरेपछी सर्वसाधारण जम्मा भएका थिए । घटनाको केहि बेरमै इलाका प्रहरी कार्यालय गौशालाको टोली घटना स्थलमा पुगेका थिए ।

चौधरीको भनाइ अनुसार मोटरसाइकलमा सवार तिनजनाको अज्ञात समुहले उनि संग भएको पैसाको ब्याग खोसेर उत्तर तर्फ भागेका थिए । तर पैसाको (खाली) ब्याग त्यहि सडकको मुनि रहेको हेमपाइपमा पुलिसको अनुसन्धानबाट फेला परेको इलाका प्रहरी कार्यालय गौशालाले जानकारी दिएका छन् ।