नेविसंघका कार्यकर्ताहरुले त्रिविको पत्रकार सम्मेलन बिथोलेपछी भयो झडप ,तिन जना घाइते

4 वर्ष पहिले प्रकाशित

(2079-05-12 B.S.)

2473 पटक देखिएको

काठमाडौं ,भदौ १२ गते

त्रिभुवन विश्वविद्यालय (त्रिवि)को पत्रकार सम्मेलन नेविसंघका कार्यकर्ताहरुले बिथोलेका छन् । आइतवार त्रिभुवन विश्वविद्यालयले आयोजना गरेको पत्रकार सम्मेलनमा सत्तारुढ नेपाली कांग्रेसनिकट नेपाल विद्यार्थी संघ (नेविसंघ)का कार्यकर्ताहरूले बिथोलिदिएका हुन् । त्रिवि प्रशासनले त्रिवि परिसरमै गरेको पत्रकार सम्मेलन आयोजना गरेका थिए ।

नेविसंघका कार्यकर्ताहरूले आक्रमणको धम्की दिएको, पटक–पटक तोडफोडमा उत्रिएको भन्दै सरकारसँग सुरक्षा माग गर्न त्रिवि प्रशासनले पत्रकार सम्मेलनको आयोजना गरेको थियो ।

नेविसंघका कार्यकर्ताहरू नाराबाजी गर्दै आफूहरूविरुद्ध गरिएको पत्रकार सम्मेलनस्थलमा पुगेका थिए । नेविसंघको नाराबाजीपछि एमालेनिकट अनेरास्ववियुले प्रतिकार गरेको थियो ।

नाराबाजीसहित पुगेका नेविसंघका कार्यकर्ता र अनेरास्ववियुका कार्यकर्ताबीच केहीबेर घम्साघम्सी भएको थियो । दुई पक्षबीच केहीबेर झडप भएको अनेरास्ववियुकी अध्यक्ष सुनिता बरालले जानकारी दिइन् । झडपमा दुईजना विद्यार्थी र एकजना प्रहरी घाइते भएका कीर्तिपुर प्रहरीले जनाएको छ ।

दुई पक्षबीचको झडपपछि अनेरास्ववियुले त्रिवि परिसरमा सरसफाइ कार्यक्रम आयोजना गरेको थियो । आफूहरू त्रिवि परिसरमा रहेको फोहर र त्रिवि प्रशासनको बेथिति सफा गर्न लागिपरेको बरालले बताइन् ।

यसअघि त्रिविले विज्ञप्ति जारी गरी विश्वविद्यालयजस्तो प्राज्ञिक थलोमा दैनिकजसो पदाधिकारीलाई धम्क्याउने, तालाबन्दी गर्ने र तोडफोडजस्ता क्रियाकलाप हुने गरेको भन्दै सरकारसँग शान्ति सुरक्षा मागेको थियो ।

त्रिवि परिसरमा ठूलो संख्यामा प्रहरी तैनाथ गरिएको छ । त्रिविले यसअघि नेविसंघका सदस्यहरुले तालाबन्दी, घेराउ, पदाधिकारी तथा कर्मचारीलाई धम्क्याउने, त्रिविको दैनिक काम–कारबाही गर्दा बारम्बार कार्यालयमा जबर्जस्ती प्रवेश गरी अवरोध सिर्जना गर्ने गरेको आरोप लगाएको थियो ।