जनकपुर ,भदौ १२ गते

मधेश प्रदेशको राजधानी जनकपुरधामस्थित रहेको   राजर्षि जनक विश्वविद्यालय 'पेपर कोर्स कन्ट्रयाक्ट' शिक्षकहरूले तालाबन्दी गरेका छन् ।

आइतबार शिक्षकहरुले विद्यालयको केन्द्रीय कार्यालयको लेखा र प्रशासन शाखामा तालाबन्दी गरेका हुन् ।

विश्वविद्यालयका कार्यवाहक भिसी डा. शैलेन्द्र नारायण मल्लिक, कार्यवाहक रजिष्ट्रार जुगेश्वर साह र विज्ञ डा. देवराज अधिकारीको तस्वीरमा आगजनी गर्नुका साथै शिक्षकहरूले विज्ञले सार्वजनिक गरेको रिपोर्टसमेत जलाएका हुन् । पेपर कोर्स कन्ट्रयाक्ट शिक्षकहरूले विज्ञ डा. देवराज अधिकारीले सार्वजनिक गरेको रिपोर्टप्रति असन्तुष्टि जनाउँदै आगजनी गरेका हुन् । 

पूर्णकालीन शिक्षक व्यवस्थापन प्रयोजनका लागि नियमावलीमा भएको व्यवस्थाअनुसार स्थायी, अस्थायी वा करारको प्रक्रियाद्वारा शिक्षक पदपूर्तिलाई प्राथमिकतामा राखी यथाशीघ्र उपयुक्त र आवश्यक कार्य गर्नुपर्ने, छोटो अवधिको शिक्षक व्यवस्थापन प्रयोजनका लागि नियमावलीको व्यवस्थाअनुरूप करार प्रक्रियाद्वारा व्यवस्थापन गर्न उपयुक्त र आवश्यक कार्य तीव्र पार्ने, वर्तमान पेपर कन्ट्रयाक्ट शिक्षकको व्यवस्थालाई नियमानुसार यथाशीघ्र पुनरावलोकन गरिने र विश्वविद्यालयका पेपर कोर्ष कन्ट्रयाक्ट शिक्षकहरूलाई नियमानुसार सेवा प्रवेश गर्न एक पटकका लागि उमेरको हदबन्दी हटाउने व्यवस्था मिलाउने सहमति भए पनि कार्यान्वयन नगरिएको आन्दोलित शिक्षकहरूको आरोप छ । 

यसअघि १ भदौमा शिक्षकहरूले भिसी र रजिस्ट्रारको कार्यालयमा ताला लगाएका थिए । शिक्षकहरूको समस्या समाधान गर्न ६ वैशाखमा उनीहरूसँग वार्ता गरी ९ वैशाखमा डा. विद्यासागर बर्मा, डा. बलराम झा र अनिल साहसहित ३ सदस्यीय समिति गठन गरिएको थियो । 

शिक्षकहरूको तर्फबाट पनि समितिमा पेपर कोर्स कन्ट्रयाक्ट संघका सभापति दिलीपकुमार यादव, सचिव रविकुमार राज र शम्भु पोखरेल सामेल भई वार्ता गरेका थिए ।

वार्ताबाट समस्या समाधान गर्ने निष्कर्ष पनि भयो, तर भिसी र रजिस्ट्रारले काठमाडौंका डा. देवराज अधिकारीलाई विज्ञ नियुक्त गरेपछि पुनः त्यसमा बखेडा सुरु हो । विज्ञले विश्वविद्यालयबाट ४ लाख रुपैयाँ शुल्क लिई दिएको रिपोर्ट सार्वजनिक नै नगरी शिक्षकहरूको समस्या समाधान गर्न कुनै चासो नदेखाउँदा आफूहरू आन्दोलित भएको पेपर कोर्स कन्ट्रयाक्ट संघका सचिव रविकुमार राजले बताए ।

शिक्षकहरू विगतमा पनि सेवा आयोगद्वारा अपारदर्शी तरिकाबाट २६ जना दरबन्दी रहेकोमा २१ वटा सिटमा मात्र विज्ञापन खुलाएको भन्दै विश्वविद्यालयमा तालाबन्दी गरी आन्दोलित भएका थिए ।