विश्‍वकप र एएफसी एशियन कपका छनोट खेल अक्टोबर र नोभेम्बरमा गराउन एएफसीको प्रस्ताव

5 वर्ष पहिले प्रकाशित

(2077-02-24 B.S.)

3752 पटक देखिएको

नेपालले खेल्ने ती खेल आगामी अक्टोबर र नोभेम्बरमा गराउन एएफसीले विश्‍व फुटबल महासंघ (फिफा)लाई प्रस्ताव गरेको हो।

काठमाडौं। एशियाली फुटबल महासंघ (एएफसी) ले कोभिड-१९ का कारण स्थगित फिफा विश्‍वकप २०२२ तथा एएफसी एशियन कप २०२३ का छनोट खेलहरू चार महीनापछि गराउने प्रस्ताव अघि बढाएको छ।नेपालले खेल्ने ती खेल आगामी अक्टोबर र नोभेम्बरमा गराउन एएफसीले विश्‍व फुटबल महासंघ (फिफा)लाई प्रस्ताव गरेको हो।

यसअघि गत चैतमा अस्ट्रेलिया, चाइनिज ताइपेइ र जोर्डनसँग छनोट खेल घरेलु मैदानमा खेल्ने तय भए पनि कोरोना भाइरसका कारण स्थगित भएको थियोे। स्थगित खेल अक्टोबर ८ र १३ तथा नोभेम्बर १२ र १७ मा गर्न प्रस्ताव गरिएको एएफसीले जनाएको छ।

विभिन्न देशका फुटबल संघसितको भिडियो बैठकपछि एएफसीले उक्त मितिमा खेल गराउन तयारी थालेको हो। दोस्रो चरणको छनोटअन्तर्गत नेपालले तीन खेल खेल्न बाँकी छ। ती सबै खेल नेपालले घरेलु मैदानमा खेल्नेछ।

एएफसीको प्रस्तावलाई फिफाले अनुमति दिएमा नेपालले ८ अक्टोबरमा चाइनिज ताइपेइ, १३ अक्टोबरमा अस्ट्रेलिया र १२ नोभेम्बरमा जोर्डनसँग खेल्नेछ।

‘समूह बी’मा रहेको नेपालले हालसम्म पाँच खेलमा तीन अंक जोडेको छ। नेपालले चाइनिज ताइपेइलाई पराजित गरी उक्त समूहमा चौथो स्थान बनाएको थियो।हालसम्मको खेल प्रदर्शनअनुसार १२ अंकका साथ अस्ट्रेलिया शीर्षस्थानमा, १० अंकका साथ कुवेत दोस्रो, समान १० अंक नै बनाएको जोर्डन तेस्रो तथा अंकविहीन अवस्थामा रहेको चाइनिज ताइपेइ ‘समूह बी’को पुछारमा छ।

समूहको शीर्षटोली विश्‍वकपको तेस्रो चरणमा पुग्नुका साथै एशिया कपमा सोझै पुग्नेछ। दोस्रो हुने टोली विश्‍वकपको तेस्रो चरणमा तथा एशिया कप छनोटको तेस्रो चरणमा पुग्नेछ।

तेस्रो, चौथो र पाँचौँ स्थानमा रहने टोली विश्‍वकप छनोटबाट बाहिरिने छन्। विश्‍वकप २०२२ कतारमा तथा एएफसी एशियन कप २०२३ चीनमा हुनेछ। रासस