सोनमा गाउँपालिकामा तेस्रो अध्यक्ष कप क्रिकेट प्रतियोगिता सुरु

5 महीना पहिले प्रकाशित

(2081-12-20 B.S.)

569 पटक देखिएको

महोत्तरी, चैत्र २० गते

सोनमा गाउँपालिकामा तेस्रो अध्यक्ष कप क्रिकेट प्रतियोगिता बुधबारदेखि श्री सरस्वती माध्यमिक विद्यालयको प्राङ्गणमा सुरु भएको छ। प्रतियोगिता गाउँपालिकाको आर्थिक सहयोग तथा स्थानीय क्रिकेट खेलाडीहरूको पहलमा आयोजना गरिएको हो।
पालिकाका अध्यक्ष बिशेश्वर प्रसाद यादवले ब्याटिङ गर्दै तथा वडा अध्यक्ष रामजीवन यादवले बलिङ गर्दै खेलको औपचारिक उद्घाटन गर्नुभयो।
प्रतियोगितामा कुल १० वटा क्रिकेट टोलीले भाग लिएका छन्। खेल अन्तर्राष्ट्रिय क्रिकेट परिषद् (ICC) का नियमअनुसार सञ्चालित हुनेछ। प्रारम्भिक चरणमा सबै टोलीहरू लिग आधारमा प्रतिस्पर्धा गर्नेछन्, जसअनुसार उत्कृष्ट टोलीहरू सेमिफाइनल तथा फाइनलमा प्रवेश गर्नेछन्। खेल आधिकारिक क्रिकेट बल (लेदर बल) प्रयोग गरेर खेलाइनेछ। आयोजक समिति अनुसार लिग चरणका खेलहरू प्रतिदिन दुईवटा खेल हुनेछन्।
प्रथम स्थान प्राप्त टोलीलाई रु ६१,००० नगद, ट्रफी र प्रमाणपत्र प्रदान गरिनेछ। दोस्रो स्थान प्राप्त टोलीलाई रु ३५,००० नगद, ट्रफी र प्रमाणपत्र दिइनेछ।
प्रतियोगिताको उद्घाटन खेलमा आयोजक सोनमा टोलीले रामगोपालपुर टोलीलाई १६१ रनको फराकिलो अन्तरले पराजित गर्दै विजयी सुरुवात गरेको छ। सोनमा टोलीका स्टार खेलाडी विकासले शतक प्रहार गर्दै उत्कृष्ट प्रदर्शन गरे। उनको विस्फोटक ब्याटिङका कारण टोलीले बलियो स्कोर खडा गर्न सफल भयो।
प्रतियोगिताका आगामी खेलहरू प्रतिस्पर्धात्मक हुने अपेक्षा गरिएको छ। आयोजक सोनमा गाउँपालिकाले सम्पूर्ण खेलहरू सफलतापूर्वक सम्पन्न गराउन आवश्यक सम्पूर्ण व्यवस्थापन गरिएको जनाएको छ।