गौशालामा हाजिरी जवाफ तथा खेलकुद प्रतियोगिता सम्पन्न

14 दिन पहिले प्रकाशित

(2081-07-13 B.S.)

386 पटक देखिएको

ममता शर्मा
महोत्तरी , कार्तिक १३ गते ।
महोत्तरीको गौशालामा हाजिरी जवाफ तथा खेलकुद प्रतियोगिता सम्पन्न भएको छ । गौशाला नगरपालिका वडा नं ६ फुलकाहा स्थित श्री मा.वि. भेडियाही फुलकाहाको प्रांगणमा नवजीवन साना किसान सहकारी संस्थाद्वारा हाजिरी जवाफ तथा खेलकुद प्रतियोगिता आयोजना गरिएको थियो । नगरका १६ वटा विद्यालयबीच नगरस्तरीय प्रतियोगिता भएको हो ।

कार्यक्रममा दौड , चेयर रेस र हाजिरी जवाफ प्रतियोगिता भएको थियो । जस अन्तर्गत दौड प्रतियोगितामा श्री राष्ट्रिय मा.वि. कान्तिबजारका छात्रा अनुरुद राउत प्रथम , भानुभक्त मेमोरियल सेकेन्डरी इंगलिस बोर्डिंग स्कुलका छात्रा दिपक राय यादव द्वितीय र त्रिभुवन मा.वि. का छात्रा रवि शंकर यादव तृतीय भएका हुन् ।

चेयर रेसमा श्री राष्ट्रिय मा.वि. कान्तिबजार प्रथम , भानुभक्त मेमोरियल सेकेन्डरी इंगलिस बोर्डिंग स्कुल द्वितीय र श्री जनता मा.वि . भरतपुरखोर तृतीय भएको छ ।

त्यसैगरि हाजिरी जवाफ प्रतियोगितामा एपेक्स एकेडेमी गौशाला प्रथम , श्री मोडर्न शारदा शिक्षा शिशु सदन रजखोर द्वितीय र श्री मा.वि . फुलकाहा र रामजानकी इंगलिस बोर्डिंग स्कुल तृतीय भएको छ ।

कार्यक्रममा प्रमुख अतिथिको रुपमा उपस्थित मधेश प्रदेशका पुर्व अर्थ मन्त्री भरत प्रसाद साहले गौशालामा यस्ता किसिममा प्रतियोगिताले खेलकुद विकासमा जोड दिने भएकोले आयोजक पक्षलाई धन्यवाद व्यक्त गरे । खेलकुदले भाइचारा सम्बन्ध स्थापितसँगै अनुशासन कायम गर्न समेत उत्तिकै प्रभावकारी भुमिका निर्वाह गर्ने उनको भनाई थियो। खेलकुदको सहयोगका लागि प्रदेश सरकार साथ सहयोग दिन तयार रहेको पनि उनले बताए।

त्यस्तै कार्यक्रममा सहयोगीका रुपमा उपस्थित युवा नेता अखिल क्रान्तिकारीका केन्द्रिय उपाध्यक्ष सुर्यनारायण साहले अनुशासित नागरिक उत्पादनका लागि खेलकुद अपरिहार्य रहेको जनाउँदै अहिले खेलकुद व्यवसायिक समेत बन्दै गएको बताए। उनले खेलले बालबालिकाको मानसिक , शारीरिक , बौद्धिक विकासमा सघाउ पुर्याउने भएकोले खेलकुदको निकै महत्व रहेको बताए ।

कार्यक्रमका संयोजक राम उमेश यादवले ‘स्वास्थ्य रहन जीवनका लागि खेलकुद , राष्ट्रका लागि खेलकुद’ भन्ने मूल नारासहित भएको खेलकुद प्रतियोगिता सफल बनाउने सम्बन्धित सबैलाई धन्यवाद ज्ञापन गरे ।