धनुषामा भूमिहिन किसानलाई कृषि उपकरण वितरण

4 वर्ष पहिले प्रकाशित

(2079-09-15 B.S.)

3193 पटक देखिएको

धनुषा - धनुषाको मिथिला नगरपालिका–८, कुसुमबिछौनामा बगर खेती गर्दै आएका भूमिहिन किसानलाई कृषि उपकरण वितरण गरिएको छ ।
कुसुमबिछौनास्ति बडहरी खोलाको नदी उकास जग्गामा तरकारी खेती गर्दै आएका भूमिहिन किसानलाई संयुक्त राष्ट्रसङ्घीय विकास कार्यक्रम (युएनडिपी) को सहयोगमा सामुदायिक सुधार केन्द्र (सिआईसी) धनुषाले बुधबार कृषि उपकरण वितरण गरिएको हो ।

वितरण गरिएको कृषि उपकरणमा ३ थान हाते ट्याक्टर, ३ थान उडर मेसिन, १ थान सिड ड्रिल मेसिन र ३० थान सिडर मेसिन रहेको छ । एक औपचारिक कार्यक्रमबीच ति कृषि उपकरणहरु मिथिला नगरपालिकाका नगर प्रमुख महेन्द्र महतोले प्रदान गरेका थिए ।

त्यस अवसरमा मिथिला नगरपालिका वडा नं. ८ का वडाध्यक्ष विन्देश्वर महतो, सिआईसी धनुषाका अध्यक्ष सञ्जयकुमार साहलगायत स्थानीयवासी उपस्थिति रहेको थियो ।

संयुक्त राष्ट्रसङ्घीय विकास कार्यक्रम (युएनडिपी) र मिथिला नगरपालिकाको सहयोगमा सामुदायिक सुधार केन्द्र (सिआईसी) धनुषाले ६५ भूमिहिन किसान परिवारलाई तरकारी खेतीका लागि नदी उकास जग्गा उपलब्ध गराएको छ ।

कोरोना प्रभावित र वैदेशिक रोजगारीबाट फर्किएका भूमिहिनलाई रोजगारी प्रदान गर्ने उद्देश्यले ६५ भूमिहिन किसान परिवारलाई ५ कठ्ठाका दरले जग्गा उपलब्ध गराएको छ ।