सम्सी पिएसि मा जनस्वास्थ्य प्रयोगशाला र आकस्मिक सेवा सुचारु

2 वर्ष पहिले प्रकाशित

(2080-06-10 B.S.)

3311 पटक देखिएको

निरन्जन कुमार साह

गौशाला , असोज १० गते

महोत्तरीको सम्सी गाउँपालिका वडा न. ७ स्थित प्राथमिक स्वास्थ्य केन्द्रमा जनस्वास्थ्य प्रयोगशाला र आकस्मिक सेवा सुचारु भएको छ । बुधवार सम्सी गाउँपालिकाको अध्यक्ष रामनाथ यादवद्वारा जनस्वास्थ्य प्रयोगशाला र आकस्मिक सेवाको समुदघाटन भएसँगै सुचारु भएको हो ।

सम्सी गाउँपालिकामा सम्पुर्ण जनसमुदायलाई स्वास्थ्य सेवा सुविधा प्रदान गर्ने उद्देश्यले सम्सी गाउँपालिकाको अध्यक्ष रामनाथ यादवले सम्सीको वडा न. ७ स्थित रहेको प्राथमिक स्वास्थ्य केन्द्रमा जनस्वास्थ्य प्रयोगशाला र आकस्मिक सेवा सुचारु गरेका छन ।

प्राथमिक स्वास्थ्य केन्द्रमा सेवा सुचारु भएपछी अबदेखि रगत पिसाब चेकजाँच गर्नुको साथै २४ घण्टा इमरजेंसी सेवा सस्तो र सुलभ रुपमा प्रदान हुने अध्यक्ष यादवले बताए । उनले भने , “मेरो योजना १५ शैयाको हस्पिटल संचालन गर्ने हो । तर जग्गा उपलब्ध नभएको कारण नेपाल सरकारको अवधारणा अनुसार प्रत्येक पालिका एक १५ शैयाको हस्पिटल स्थापना गर्ने अभियानमा सम्सी गाउँपालिका पछाडी परेको छ । तर छिटै स्थापना हुने हाम्रो प्रयास छ।”

त्यसैगरि वडा न. ७ का वडा अध्यक्ष राकेश यादवले सो प्राथमिक स्वास्थ्य केन्द्र आफ्नो वडामा पर्ने भएकोले जिम्मेवारीपुर्वक त्यसको निगरानी र रेखदेख गर्ने बताए। उनले भने , “यो प्राथमिक स्वास्थ्य केन्द्र मेरो वडामा रहेको छ । निगरानीको जिम्मा मेरो दायित्व हो । जनसमुदायमा थप जनस्वास्थ्य प्रयोगशाला र आकस्मिक सेवा सुचारु समेत भएको छ । अब यहा २४ घण्टा एमबिबिएस डाक्टरको व्यवस्था गरिएको छ ।"

कार्यक्रममा पुर्व स्वास्थ्य राज्य मन्त्रि डा. सुरेन्द्र यादव, सम्सी गाउँपालिकाका कार्यालय प्रमुख गणेशचन्द्र मिश्र, वडा न. ६ का वडा अध्यक्ष शेष उमैद लगायत प्राथमिक स्वास्थ्य केन्द्र सम्सीका स्वास्थ्यकर्मीको उपस्थित थियो ।