गौशालामा पालिकाले भत्काएको घर पुन: बनाउन खोजेपछी निर्माण कार्य रोक्न आदेश

1 वर्ष पहिले प्रकाशित

(2080-06-15 B.S.)

7224 पटक देखिएको

ममता शर्मा

गौशाला , असोज १५ गते

महोत्तरीको गौशाला नगरपालिकाले केहि समय अगाडी भत्काएको घर पुन: बनाउन खोजेपछी निर्माण कार्य रोक्न आदेश दिएको छ । निगौल गाई गौशालाको नाममा रहेको गौशाला बजार क्षेत्रभित्रको सिकिन्दर कुमार चौरसियाको घर केहि समय अगाडी २०७९ साल फाल्गुन २९ गते पालिकाको नगर प्रहरीले भत्काएको थियो ।

चौरसियाले पालिकाले भत्काएको घर पुन: निर्माणको थालनी गरेका छन् । जसले गर्दा पालिकाले सोमबार पत्र काट्दै अनाधिकृत रुपमा जग्गामा घर निर्माण गर्न लागेकोले निर्माण कार्य तुरुन्त रोक्न निर्देशन दिएको छ । साथै ३ दिन भित्र जग्गा खाली गर्न आग्रह गरेको छ ।

नगरपालिकाद्वारा काटिएको पत्र सोमबार नगर प्रहरी टेक बहादुर लामाद्वारा सिकिन्दरलाई बुझाइएको छ । पत्र बुझ्दै सिकिन्दरले नगरपालिकाले त्यति सजिलैसँग घर भत्काउन नपाउने बताएका छन् ।उनले भने , "घर भत्काउनको लागि मलाइ पालिकाको होइन अदालतको आदेश चाहियो । यहाँ अन्य घरहरु पनि यस्ता छन् , जसले गाई गौशालाको जग्गामा घर बनाएर बसिरहेका छन् । मेरो बन्न लागेको घर भत्किन्छ भने अरुको पनि घर भत्किनुपर्यो ।"

चौरसियाले पालिकाले पटक पटक आफ्नो घर भत्काएकोले आफुमाथि अन्याय भएको गुनासो गरेका छन् । गौशाला बजारमा अनाधिकृत रुपमा जग्गा हड्पेर घर बनाएर वर्षौदेखि कयौं मानिसहरु बसोबास गर्दै आएका छन् तर धनि धनाढ्य भएर उनीहरुलाई केहि नगरेको र गरिव ,निमुखा जनताको घर भत्काउन लागेर पालिकाले खोक्रो शासन गरिरहेको उनले आरोप लगाएका छन् । उनले भने , "भुमि व्यवस्था सहकारी तथा गरिवी निवारण मन्त्रि पद्मा अर्यालले मिति २०७६ फाल्गुन १९ गते गाई गौशालामा बनाएको ३० वटा घरहरु भत्काएको थियो । अहिले फेरी त्यो सबै घरहरु पुन: बनिसकेको छ । तर घर भत्काउने आदेश मेरो लागि मात्र किन ? अरु घरतिर नगरपालिकाको आखाँ किन जादैन ?"