राजनीतिमा युवाको आकर्षण कसरी

2 वर्ष पहिले प्रकाशित

(2080-06-27 B.S.)

2884 पटक देखिएको

युवालाई राजनीतिमा प्रवेशका लागि आकर्षण गर्न पार्टीले नै नीति अनि कार्यक्रम बनाउनुपर्छ। सक्षम युवालाई राजनीतिक रूपमा विकास गर्न अनि आर्थिक रूपमा सहयोग गर्न अब पार्टी अनि राज्यकै तहबाटै पहल गर्नुपर्छ। अहिले युवाको दुरुपयोग गर्ने संस्कारभन्दा युवालाई सक्षम नेता बनाउने संरचना अब पार्टीभित्रै बनाउनुपर्छ।

संगठनले युवामा जति लगानी गर्छ, देशले त्यति नै लाभ पाउँछ। युवाले पार्टी कार्यकर्ताका रूपमा मात्र नभएर स्वतन्त्र विचार विमर्श गर्ने समूहका रूपमा पनि सहभागी भएर राजनीतिलाई दिशानिर्देश गर्न सक्नुपर्छ। आफ्नो नेता अनि प्रतिनिधिलाई जवाफदेही बनाउन महत्त्वपूर्ण भूमिका खेल्न सक्नुपर्छ। राजनीतिक दलभित्रै पनि आफ्ना नेताहरूलाई दबाब दिन सक्नुपर्छ। अब पनि युवालाई अनुभवहीन भनेर पन्छाउने हो भने फेरि हाम्रो राजनीति अनि हामी अघि बढ्न सक्दैनौं।

अब प्रत्येक युवाले आफ्नो ताकत र क्षमतालाई चिनेर अगाडि आउनै पर्छ। हरेक युवालाई आफ्नो क्षमताको पहिचान हुदै आफूप्रति भरोसा हुनुपर्छ। यो पुरानो नेपाल हैन जहाँ कलिलै युवाहरूको हातमा बन्दुक, हसियाहतौडा र क्रान्तिका ज्वाला थमाइयोस। अबको नयाँ नेपाल शान्त मय हुनुपर्छ जहाँ प्रत्येक नेपाली युवालाई राजनीतिक संस्कार, इमान्दारिता र सक्ष्ँम आदर्शवान हुन सिकाइयोस। अबको नेतृत्वकर्ता कारागारमा बिताएको नहोस् बरु जोगी सन्त नै किन नहोस् । अबको नेतृत्वकर्ता जंगलमा बसेको भएपनि हुन्छ तर बुद्ध बनेर निस्कियोस तर सत्र हजार नेपाली मार्ने हिंसक नहोस्। अबको नेतृत्वकर्ता हसाउने होस् तर विकासको नाममा हसाएर नेताबाट कमेडि म्यान नहोस।

भनिन्छ राजनीतिमा लागेपछि व्यक्तिको विकास हुन्छ तर देशको बिकास हुँदैन। अहिलेसम्म यही भइरहेको छ। राजनीति गरिखाने माध्यम होइन तर देश विकास गर्ने माध्यम राजनीति बन्न सक्छ। यी कुराहरुलाई बुझेर हरेक युवाले राजनीतिक ज्ञान लिनै पर्छ। महिला र पुरुष युवाहरूको समावेशीकरण हुनुपर्छ। अब बुढा राजनीतिकर्मिहरुलाई आराम गर्न पठाउनु पर्छ। अनि युवाले देश सम्हाल्नुपर्छ र नयाँ पुस्तालाई समृद्ध नेपाल देखाउनै पर्छ।