निरन्जन कुमार साह 

महोत्तरी , कार्तिक २९ गते

महोत्तरीको भंगहामा प्रदेश स्तरीय भलिबल खेलकुद प्रतियोगिता सुरु भएको छ । बुधबार देखि भंगहा नगरपालिका -७ गोरहन्ना स्थित जिल्ला भलिबल संघको आयोजनामा श्री नारायण मा. वि. को प्राङ्गणमा  प्रतियोगिता सुरु भएको हो ।

प्रतियोगिताको उद्घाटन शत्रमा आफ्नो मन्तव्य दिदै महोत्तरी जिल्ला भलिबल संघका अध्यक्ष रामकरण चौधरीले स्वास्थका लागि खेलकुद आवश्यक रहेको बताउनु भयो । राष्ट्रको सुदृढीकरणका लागि खेलाडीहरुको सिर्जना हुनु आवश्यक छ भने स्थानीय सरकार लगायत प्रदेश सरकारले पनि खेलमा लगानी गर्न आवश्यक रहेको उहाँ भनाइ थियो । खेल मानव जिवनको अभिन्न अंग हो , उहाँ भन्नुहुन्छ , " खेल सबै जातजाती ,धर्म एवं समुदाय वर्गको लागि अपरिहार्य छ यसले मानिसलाई अनुशासन कायम गर्न ठुलो भुमिका निर्वाह गरेको हुन्छ तसर्थ सम्पुर्ण सरोकारवालावाला निकायले खेलमा र खेलाडीको लागि लगानी साथै प्रोत्साहन प्रदान गर्न जरुरी छ । "

कार्यक्रममा भलिबल संघका मधेस प्रदेश अध्यक्ष ज्ञानेन्द्र प्रसाद यादवले महोत्तरी जिल्लामा भलिबल प्रतियोगिता सुरु गरेकोमा आयोजकलाई धन्यवाद दिएका छन् । मधेसमा भएका विभेद अन्त्य गरि समतामूलक समाज निर्माण गरि महिलाहरुलाई विभिन्न अवसर प्रदान गरेमा मधेसका महिलाहरु आगाडी बढ्ने बताउनु भयो । भलिबलको संस्थागत विकास गर्नु आवश्यक छ, उहाँ भन्नुहुन्छ , " मधेस प्रदेशले पनि उत्कृष्ट खेलाडी सिर्जना गर्न सक्नुपर्छ । जिम्मेवार नागरिक उत्पादनका लागि खेल आवश्यक रहेको छ । खेलकुद विना अध्ययन पनि अधुरो  छ । हामीले त्यसको लागि केही नीति , केही योजनाहरु ल्याउन आवश्यक छ । देश विकासको लागि खेलकुद देखि लिएर हरेक क्षेत्रको विकास हुनु जरुरी छ।"

त्यसैगरि युवाहरुमा भएका प्रतिभालाई उजागर गर्नु आवश्यक रहेको समेत यादवले बताउनु भयो । खेलकुदको विकास गर्नु त्यति सहज नभएपनि हाम्रो संयुक्त प्रयासले यो सम्भव रहेको पनि उहाँको भनाइ थियो ।

कार्यक्रममा प्रमुख अतिथीका रुपमा उपस्थित प्रदेश सांसद तथा पुर्व गृह तथा संचार मन्त्री भरत प्रसाद साहले युवा वर्गहरूलाई लागु औषधको दुर्व्यसनबाट बचाउनको लागि समय सापेक्ष खेल सम्बन्धि विभिन्न प्रतियोगिताहरु संचालन हुन आवश्यक रहेको औंल्याउनु भयो । अहिलेका युवाहरु लागू औषधको दुर्व्यसनमा बढी पर्ने गरेका छन , उहाँले भन्नुभयो , " कुलतबाट युवाहरूविचको दुरि कायम गर्न खेल जरुरी छ । खेलले स्वास्थ्य निरोगी मनस्थिति कायम गर्नुको साथै शारीरिक , मानसिक विकासमा टेवा पुर्याउछ । मनोरञ्जन समेत प्रदान गर्ने भएकाले यसको निकै महत्त्व छ ।"

उद्घाटन समारोहमा मधेस प्रदेशका सांसद तथा पुर्व गृह तथा संचार मन्त्री भरत प्रसाद साह , महोत्तरी जिल्ला भलिबल संघको अध्यक्ष रामकरण चौधरी , उपाध्यक्ष ज्ञानेन्द्र कुमार यादव , प्रदेश भलिबल संघका अध्यक्ष ज्ञानेन्द्र प्रसाद यादव , कार्यपालिका सदस्य राजदेव प्रसाद सिंह लगायत विभिन्न खेलाडी ,खेलप्रेमी ,समाजसेवि ,जनसमुदायको सहभागीता थियो ।

पहिल दिनको खेलमा आज सर्लाहीबाट श्री लक्ष्मीनाथ युवा क्ल्ब  र धनुषा जिल्लाबाट धनुषा जिल्ला भलिबल संघ विच प्रतिस्पर्धा भएको छ ।