महोत्तरीमा चिसो बढ्दै गएपछी जनजीवन प्रभावित

2 वर्ष पहिले प्रकाशित

(2080-10-07 B.S.)

802 पटक देखिएको

ममता शर्मा , महोत्तरी

महोत्तरी लगायत तराइका विभिन्न जिल्लामा केहि दिनदेखि चिसो बढ्दै गएको छ भने दिउँसोको समयमा घाम लाग्न छोडेको छ । पछिल्लो केहि दिनदेखि बिहान , बेलुका र दिउँसोको समयमा पनि चिसो हावा र शितलहर बढेपछी स्थानीयहरुको जनजीवन प्रभावित भएको छ ।

महोत्तरी लगायत पूर्वी तराईका जिल्लामा निरन्तर बढ्दै गएपछी कठ्याङ्ग्रिदो हावा, शीतलहर, हुस्सु र बाक्लो कुहिरोका कारण मानिस, गाईवस्तु तथा जीवजन्तु समेत प्रभावित भएका छन् ।

जिल्लाको सहरी तथा ग्रामीण भेगमा मानिसको चहलपहलमा कमी आएको छ । चिसो बढेसँगै बजारमा बाक्लो ऊनीका कपडाको बिक्री भने बढेको व्यापारी बताउँछन् । स्वास्थ्य केन्द्रसहित जिल्ला अस्पतालमा रुघा, खोकी, दम तथा हाडजोर्नी दुखाइका बिरामीको सङ्ख्यामा वृद्धि भएको चिकित्सक बताउँछन् । लगातार बढ्दै गएको जाडोबाट बालबालिका, वृद्धवृद्धा र सुत्केरी बढी प्रभावित भएका छन् ।

दश नगरपालिका र पाँच गाउँपालिका रहेको महोत्तरीको विभिन्न गाउँबस्तीमा जाडोबाट बच्नका लागि ठाउँठाउँमा स्थानीयवासील आगो बालेर ताप्ने गरेको देखिन्छ । विभिन्न पालिकाले आ–आफ्नो क्षेत्रका गाउँ बस्तीमा आगो बाल्न निःशुल्क दाउरा उपलब्ध गराउनुका साथै कम्बल, सिरक तथा न्यानो कपडा वितरण गरिरहेका छन् ।