ममता शर्मा

महोत्तरी , फाल्गुण १३ गते

महोत्तरीको चर्चित गौशाला बजारमा व्यवस्थित पार्किंगको व्यवस्थापन नहुँदा यात्रु लगायत व्यापारीहरुलाई आवतजावत गर्न निकै कठिनाई भएको छ । साथै बजारमा अवस्थित बैंकहरुले आफ्नो सेवाग्राहीहरुको लागि पार्किंग स्थल व्यवस्थापन नगर्दा बजारमा बाटो अवरुद्ध हुने गरेको छ । बजारमा रहेको सिटिजन्स बैंक , प्राइम कमर्सियल बैंक , एनआईसी एसिया बैंक लगायतका बैंकहरुले पार्किंग व्यवस्था नगर्दा अन्य सर्वसाधारण र व्यापारीहरु मारमा परेका छन् ।

हप्ताको दुइ दिन सोमबार र विहिबार लाग्ने बजारमा कौशौ टाढाबाट बैंकमा सेवा लिनको लागि विभिन्न सर्वसाधारण तथा सेवाग्राही आउने गर्दछन र पार्किंग नहुँदा सडकमै सवारीसाधन राख्ने गर्दछन् । जसले गर्दा बजारमा आउने व्यापारी तथा सर्वसाधारण व्यक्तिलाइ पार्किंग नभएर सास्ती भोग्नुपरेको छ । बजारमा किनमेल गर्न आउने तथा बैंकको कार्यले आउनेहरुले प्रत्येक बैंकहरुको अगाडी बिच बाटोमै मोटरसाईकल, साईकल, जथाभावी राख्ने गरेकाले आवत जावतमा समस्या भएको स्थानीयहरुको गुनासो छ । बैंकले सेवाग्राहीको लागि पार्किंगको व्यवस्था गर्नुपर्ने भएता पनि सो कुनै बैंकले गरेका छैनन् ।  

गौशाला बजारमा पार्किंगको व्यवस्थापन उचित तवरले हुन नसक्दा र बैंकहरुको लापरबाहीले सडक जाम हुने गरेको र जनसमुदाय दु: ख भोग्न बाध्य भएको एक व्यापारीले बताए । उनले भने , “पार्किंग नहुँदा बजारमा जताततै मोटरसाइकल , साइकल अव्यस्थित तरिकाले राखिएको हुन्छ । अझ बैंकहरुको अगाडी त अत्यधिक रुपमा सवारी साधन पार्किंग गरिएको हुन्छ । अन्य दिन खासै समस्या सिर्जना नभएपनि बजारको दिन सोमबार र विहिबार निकै समस्या हुन्छ । यसले गर्दा बाटो जाम हुने , झैँझगडा हुने , दुर्घटना हुने जोखिम बढेको छ । तरपनि बैंकबालाहरुले आखाँ चिम्म गरेर बसेका छन् । त्यसमा उनीहरुको विशेष ध्यान जान जरुरि छ ।”

साथै उनले गौशाला बजारमा केहि बैंकहरुले अत्यधिक लापरबाही गर्ने गरेको गुनासो गरेका छन् ।

यस सम्बन्धमा गौशाला नगरपालिका वडा न. ५ का वडा अध्यक्ष ओम प्रकाश गुप्ताले पटक पटक जानकारी गराउंदा पनि बैंकहरुले नटेरेको जानकारी दिए । बैंक अगाडी सधै निकै जाम लाग्ने गरेको भएपनि बैंकको म्यानेजर तथा गार्डले त्यसमा चासो नदिएको उनले बताए । साथै उनले दुर्घटनाको जोखिम न्यूनीकरणको लागि नगर प्रहरीको परिचालन हुनु जरुरि रहेको बताए ।

त्यसैगरि जसपाका गौशाला नगर अध्यक्ष कुमरकान्त झाले सम्बन्धित सरोकारवाला व्यक्तित्वहरुले गौशाला बजार व्यवस्थापनमा चासो नलिएको बताएका छन् । बैंककै अगाडी अनेकौ सवारीसाधन राखिएको हुन्छ भने सडक जाम भएर सर्वसाधारण ,किसानवर्गहरुलाई ओहोर दोहोर गर्न सास्ती भएपनि सम्बन्धित निकाय तथा बैंकले अलिकति पनि चासो नलिएको बताए ।