गौशालामा १०० बेडको अस्पताल बनाउने अठोट गरेको छु : नगर प्रमुख महतो

2 वर्ष पहिले प्रकाशित

(2080-11-14 B.S.)

727 पटक देखिएको

निरन्जन कुमार साह

महोत्तरी , फाल्गुन १४ गते

महोतरीको गौशाला नगरपालिकाका नगर प्रमुख डा. दिपेन्द्र महतोले १०० बेड सम्मको अस्पताल बनाउने अठोट रहेको बताएका छन् । उनले गौशाला नगरपालिकामा १०० बेडको अस्पताल आफ्नो कार्यकालमा निर्माण गर्ने योजना अनुसार कार्य गर्ने जानकारी दिए ।

सोमबार गौशाला नगरपालिकाको प्राथमिक स्वास्थ्य केन्द्रमा १५ बेडको अस्पतालको छत ढलान कार्यको अनुगमन नगर प्रमुखले गरेका छन् । सो क्रममा नगर प्रमुख महतोले प्राथमिक स्वास्थ्य केन्द्रमा १५ बेड सहितको सुविधा प्रदान गर्ने भवन निर्माण हुन गईरहेकोमा त्यसलाई १०० बेड सम्मको सुविधा सम्पन्न अस्पताल बनाउने उद्देश्य रहेको बताए ।

महोत्तरी जिल्लाकै दोश्रो शहरको रुपमा रहेको गौशालामा आफ्नै कार्यकालमा १०० बेडको अस्पताल निर्माण गरि जनसमुदायलाई सहज रुपमा स्वास्थ्य सुविधा प्रदान गरिने योजना रहेको उनले बताए । यहाँ कोशौ टाढाबाट मानिसहरु वा सेवाग्राहीहरु आउने गर्दछन् , उनले भने , “जनसमुदायको सहजता लागि प्रसुती गृह सहितको सुविधा सम्पन्न अस्पताल बनाउने लक्ष्य राखेको छु । म एउटा डाक्टरको नाताले कम्तिमा स्वास्थ्य क्षेत्रमा राम्रो विकास गर्नु मेरो प्रमुख दायित्व हो । यहाँ विकासको नाममा धेरैले जनतालाई ठगेका छन् । तर म जनतालाई विकास गरेर देखाउने छु । देशमा १५ बेड सम्मको अस्पताल प्रत्येक पालिकामा लागु गरीएपनि कतिपय पालिकामा अहिले सुरुवात पनि भएको छैन । तर गौशाला नगरपालिकामा भवन निर्माणको क्रममा आज पहिलो तल्लाको छत ढलान भएको छ । म निकै खुसि पनि छु ।”

साथै नगर प्रमुख महतोले प्राथमिक स्वास्थ्य केन्द्रको सो परियोजना २ वर्ष भित्रमा सम्पन्न भइ संचालन हुने जानकारी दिए ।