मुसलधारे वर्षाले गौशाला जलमग्न (फोटो फिचर)

3 महीना पहिले प्रकाशित

(2081-03-27 B.S.)

592 पटक देखिएको

ममता शर्मा

महोत्तरी , असार २६ गते

महोत्तरीमा बुधबार बिहानैदेखि परेको मुसलधारे वर्षाले गौशाला नगरपालिकाका अधिकांस स्थान जलमग्न भएका छन् । गौशालाको जिरोमाइल देखि इलाका प्रहरी कार्यालयसम्मको सडक जलमग्न भएको छ । सडक जलमग्न भएपछि आवतजावतमा समस्या भएको छ भने इलाका प्रहरी कार्यालय भित्र समेत पानी पसेको छ। त्यस्तै गौशालाकै कृष्णनगर र शान्ति नगर समेत पानीले जलमग्न भएको छ भने ति क्षेत्रमा अवस्थित खेतहरुमा ठुलो मात्रामा पानी जमेको छ ।

उचित रुपमा नाली निर्माण तथा व्यवस्थित नभएकोले शान्ति नगर र कृष्णनगरको सडकमा पानी निकास नहुँदा सर्वसाधारण तथा सवारी साधनहरुलाई यात्रा गर्न निकै कठिनाइ भएको छ। सडकमै पानी बग्नुको साथै त्यस क्षेत्रका घरहरुमा डुबानको समेत जोखिम बढेको छ ।

सोनी खोलाको पानी व्यवस्थित सम्बन्धित निकायले नगरेपछि गौशालाका जनतालाइ वर्षेनी यो समस्याले सताउने गरेको कृष्ण नगरका एक किसानको गुनासो छ उनले भने अहिले यहाँका घरहरु डुबानमा त परेका छैनन् तर अझै केहि दिन पानी परेमा डुबानको जोखिम बढ्नेछ । वर्षाले स्थानीयवासीका खेतबारी जलमग्न भई तलाउजस्तै देखिएका छन्। पानी निकास हुने गरेका नाला व्यवस्थित नहुँदा बर्सेनि यो समस्या हुने गरेको छ ।

यसतर्फ गौशाला नगरपालिकाले समयमै विशेष ध्यान दिनुपर्ने समेत उनले बताए ।