सम्सी गाउँपालिकामा भ्रष्टाचार नियन्त्रण र सुशासन प्रवर्द्धनका लागि एक दिने अन्तरक्रिया कार्यक्रम सम्पन्न

15 दिन पहिले प्रकाशित

(2081-05-16 B.S.)

172 पटक देखिएको

निरन्जन कुमार साह
महोत्तरी , भदौं १६ गते

महोत्तरीको सम्सी गाँउपालिकामा अख्तियार दुरुपयोग अनुसन्धान आयोग बर्दिवासको आयोजनामा एक दिने स्थानीय स्तरमा भ्रष्टाचार नियन्त्रण र सुशासन प्रवर्द्धनका लागि सम्बन्धित सरोकारवालाहरुसँग अन्तरक्रिया कार्यक्रम सम्पन्न भएको छ ।

स्थानीय स्तरमा सबैभन्दा बढी भ्रष्टाचार भएकोले यस्तो कार्यक्रम पालिकाहरुमै गर्नु आवश्यक रहेकोले आयोगले उक्त कार्यक्रम गरेको हो । जनप्रतिनिधिहरुसँग अन्तरक्रिया कार्यक्रम गरि भ्रष्टाचार नियन्त्रण र सुशासन कसरि लागु हुने सन्दर्भमा छलफल गरिएको हो । त्यस्तै अख्तियार दुरुपयोग अनुसन्धान आयोग बर्दिवासको शाखा अधिकृत सर्मिला पौडेलले कार्यक्रममा आफ्नो प्रजेंटेसन प्रस्तुत गरेकी थिइन् । प्रजेंटेशनमा भ्रष्टाचारजन्य कसुर र सजाय , मुद्धा , उजुरी फर्छ्यौट अवस्था सन्दर्भमा जानकारी गराइन् ।

महोत्तरी जिल्लाबाट चालु आर्थिक वर्ष २०८१/०८२ को भदौ १५ गते सम्म स्थानीय तहबाट जम्मा २१३ उजुरी परेको र फर्छ्यौट ३४ ओटा भएको र १७९ ओटा फर्छ्यौट बाँकी रहेका छन् । जसमध्य आयोगमा सम्सी गाउँपालिकाको १३ वटा उजुरी परेको छ भने ४ ओटा फर्छ्यौट भएको शाखा अधिकृत सर्मिला पौडेलले जानकारी दिइन् । उनले भनिन् , " अहिले उजुरी पर्ने मुद्धाहरुमध्य सार्वजानिक खरिद निर्माणमा ,गलत इस्टिमेट ,बजेट टुक्राएर खरिद गर्ने ,आवश्यक्ता भन्दा बढी खरिद गर्ने जस्ता उजुरीहरु बढी परेको छ ।"

कार्यक्रममा जनप्रतिनिधिबाट आएको गुनासो र प्रश्नको जवाफ दिदै अख्तियार दुरुपयोग अनुसन्धान आयोग बर्दिवासको सुचना अधिकारी तुलसीराम पौडेलले भ्रष्टाचार नियन्त्रण गर्नु सबैको साझा दायित्व रहेको बताए । यसमा सबैले सहयोग गरेमा मात्र भष्टाचार नियन्त्रण हुने र सुशासन पनि कायम रहने छन भन्दै एउटै उदेश्य एउटै नारा भष्टाचारबाट छुटकारा हाम्रो सबैको अभिभारा नाराका साथ कार्यक्रमलाई समापन गरेका थिए ।

कार्यक्रममा अख्तियार दुरुपयोग अनुसन्धान आयोग बर्दिवासको कर्मचारी, सम्सी गाँउ पालिकाका जनप्रतिनिधिहरु पालिकाका सबै शाखाका कर्मचारीहरु लगायत शिक्षकहरुको समेत उपस्थित रहेको थियो ।