महोत्तरीमा एमालेको पार्टी प्रवेश कार्यक्रम भव्यताका साथ सम्पन्न

10 महीना पहिले प्रकाशित

(2081-07-05 B.S.)

847 पटक देखिएको

अनिल कुमार यादव
सोनमा , कार्तिक ५ गते

महोत्तरी जिल्लाको सोनमा गाउँपालिका स्थित नेपाल कम्युनिस्टपार्टी नेकपा एमाले आयोजना गरेको चियापान तथा शुभकामना आदान प्रदान कार्यक्रम आइतबार भव्यताका साथ सम्पन्न भएको छ । साथै कार्यक्रममा विभिन्न पार्टी परित्याग गरि सयौं नेता तथा कार्यकर्ताहरु एमाले पार्टीमा प्रवेश गरेका छन् ।

विभिन्न पार्टी परित्याग गरेर एमालेमा प्रवेश गरेका नव प्रवेशी नेता तथा कार्यकर्ताहरुलाई मधेश सरकारका भौतिक पूर्वाधार तथा विकास मन्त्री सरोज कुमार यादवले स्वागत तथा बधाई दिनुका साथै फुलमाला र अबिर लगाएर पार्टी प्रवेश गराएका छन् ।

पार्टी प्रवेश कार्यक्रमलाई सम्बोधन गर्दै मन्त्री यादवले सोनमा गाउँपालिका लगायत अन्य स्थानमा पनि एमाले पार्टी प्रति आम जनताको लहर बढ्दै गएको उनले बताए ।

मन्त्री यादवको प्रमुख आतिथ्यतामा भएको पार्टी प्रवेश कार्यक्रममा मन्त्री यादव लगायत अन्य सहभागी अतिथिहरुले शुभ दिपावली एवं छठ पर्वको अवसरमा पार्टीका नेता तथा कार्यकर्ता एवं उपस्थित सम्पुर्ण जनसमुदायमा सुख, शान्ति, सु(स्वास्थ्य तथा समृद्धि एवं उत्तरोत्तर प्रगतिको कामना सहित हार्दिक मंगलमय शुभकामना समेत व्यक्त गरेका थिए ।

कार्यक्रममा मन्त्री यादवसहित महोत्तरी क्षेत्र न. १ का प्रतिनिधि सभा सदस्य लक्ष्मी महतो , नेकपा एमालेका महोत्तरी जिल्ला अध्यक्ष बलिराम यादव , रामगोपालपुर नगरपालिकाका नगर प्रमुख रामदुलार साह लगायत विभिन्न नेता तथा कार्यकर्ताहरुको सहभागिता रहेको थियो ।