गौशालामा सडक दुर्घटना न्यूनीकरण गर्न ट्राफिक चेकजाँचमा कडाई

9 महीना पहिले प्रकाशित

(2081-08-11 B.S.)

341 पटक देखिएको

ममता शर्मा , महोत्तरी ।

ट्राफिक प्रहरीले गौशालामा सवारी साधन जाँचमा कडाइ गरेको छ । सडक दुर्घटना बढ्दै गएपछि न्यूनीकरण गर्न सवारी साधन जाँचमा कडाइ गरिएको गौशाल ट्राफिक प्रहरी कार्यालयका प्रहरी नायव रमेश कुमार श्रेष्ठले बताए । दुर्घटना बढ्नुमा यात्रु, चालक र सबै निकायको भूमिका हुने गरेको श्रेष्ठको भनाई छ ।

‘पछिल्लो समय ट्राफिक नियमको पालना नगर्दा सडक दुर्घटना बढ्दो छ, हामीले सडकमा चल्ने सवारी साधनको जाँचमा कडाइ गरेका छौँ’, उनले भने, ‘ट्राफिक नियम पालना गर्न लापरबाही गर्दा दुर्घटना बढिरहेका छन् ।’ उनका अनुसार गौशालामा बिना हेलमेट यात्रा गर्ने , तिनजना सम्म सवारी साधनमा बस्ने गरेको र तिब्र गतिमा समेत सवारी साधन चलाउने गरेको पाइएको छ । ट्राफिक नियम उल्लङ्घन गर्नेलाई जरिवाना भराउनाका साथै सचेत गर्ने गरिएको प्रहरी नायव निरीक्षक श्रेष्ठले बताए ।

ट्राफिक प्रहरीले मात्र नियमको पालना गराएर मात्र सवारी दुर्घटना न्यूनीकरण गर्न गाह्रो हुने उनको भनाइ छ । उनका अनुसार जीर्ण सडकको अवस्था, चालकको लापरबाही, तीव्र गति, अस्वस्थ प्रतिस्पर्धाका कारण सडक दुर्घटना बढिरहेका छन् । तसर्थ दुर्घटना न्यूनीकरणको लागि ट्राफिक नियमको पालना गराउने, जनचेतनामूलक कार्यक्रम बढाउने, सम्बन्धित निकायहरूसँग समन्वय गरी सडक निर्माण, चालक, सह–चालक लक्षित सचेतना, ओभर लोड नियन्त्रण गर्ने लगायतका कार्यहरु गर्न जरुरि रहेको श्रेष्ठको सुझाव छ ।