वातावरण संरक्षणका लागि गौशालामा वृक्षारोपण

11 महीना पहिले प्रकाशित

(2082-04-13 B.S.)

646 पटक देखिएको

गौशाला, साउन १३ गते ।

वातावरण संरक्षणको उद्देश्यसहित महोत्तरीको गौशालामा वृक्षारोपण कार्यक्रम सम्पन्न भएको छ। गौशाला नगरपालिका वडा नं. ४ स्थित जिरोमाइलदेखि उत्तर रामनगरसम्मको सडक खण्डमा वृक्षारोपण गर्न थालिएको हो।

कार्यक्रमको उद्घाटन मधेश प्रदेशका पूर्व अर्थमन्त्री भरत प्रसाद साहले एक बिरुवा रोपेर गरेका थिए। उनले वातावरण जोगाउनु सबै नागरिकको दायित्व भएको उल्लेख गर्दै, "हरेक वर्ष वृक्षारोपण गरेर हरियाली वातावरण बनाउनु हाम्रो मुख्य उद्देश्य हो," भन्ने बताए।साथै, स्थानीय युवा र बालबालिकालाई पनि वृक्षारोपणमा जोडेर वातावरणप्रतिको उत्तरदायित्वबोध गराउने प्रयास गर्नुपर्छ मन्त्रि साहले बताए ।

कार्यक्रममा डिभिजन वन कार्यालय जलेश्वरका प्रमुख अजय कुमार मिश्रले पनि एक बिरुवा रोपेर वातावरणीय सन्तुलन कायम राख्ने सन्देश दिएका थिए। त्यस्तै, टुटेश्वरनाथ साझेदारी वन उपभोक्ता समूहका अध्यक्ष बिनय कुमार झाले हरियाली वातावरण जोगाउन वृक्षारोपण आवश्यक रहेको बताए।
डिभिजन वन कार्यालय महोत्तरी र टुटेश्वरनाथ साझेदारी वन उपभोक्ता समूहको सहकार्यमा गौशाला–सम्सी सडक खण्डको दुबै किनारमा करिब ७ किलोमिटर क्षेत्रमा १५०० बिरुवा रोप्ने अभियान सुरु गरिएको छ।

यस वृक्षारोपण अभियानले जलवायु परिवर्तन, वायू प्रदूषण तथा भूमिक्षय जस्ता चुनौतीहरूको समाधानतर्फ एक सकारात्मक कदम हुने आयोजकहरूको विश्वास छ।
समूहका अध्यक्ष बिनय कुमार झाले वृक्षारोपणलाई मौसमी कार्यक्रम होइन, दिगो वातावरणीय आन्दोलनको रूपमा अगाडि बढाउने प्रतिबद्धता व्यक्त गरेका छन ।
कार्यक्रममा माओवादी पार्टीका केन्द्रीय नेता सूर्यनारायण साह, विजय साह, श्री किशोर साहलगायत विभिन्न क्षेत्रका व्यक्तिहरुको उपस्थिति रहेको थियो।