अविरल वर्षाका कारण देशभर ४६ जनाको मृत्यु, ६ जना बेपत्ता

5 महीना पहिले प्रकाशित

(2082-06-20 B.S.)

356 पटक देखिएको

महोत्तरी, असोज २० गते ।

असोज १७ गतेदेखि असोज १९ गतेसम्म देशभर परेको अविरल वर्षाका कारण विभिन्न जिल्लामा ४६ जनाको मृत्यु भएको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) का अनुसार इलाम, रौतहट, उदयपुर, प्यूठान, खोटाङ, कञ्चनपुर र मोरङ लगायतका जिल्लामा पहिरो, चट्याङ र बाढीका घटनाले जनधनको ठूलो क्षति पुर्‍याएको हो।

प्राधिकरणले सोमबार सार्वजनिक गरेको विवरण अनुसार, मृत्यु हुनेमध्ये सबैभन्दा धेरै इलाममा ३१ जना रहेका छन्। रौतहटमा ३ जना, उदयपुरमा २ जना, प्यूठानमा ७ जना, खोटाङमा १ जना, कञ्चनपुरमा १ जना र मोरङमा १ जनाको मृत्यु भएको उल्लेख छ।

त्यस्तै, ६ जना बेपत्ता भएका छन्, जसमा रुख्सुवा र इलामका नागरिक पनि परेका छन्। पहिरो र खोलाले बगाउँदा उनीहरू हराएको प्राधिकरणले जनाएको छ।

विपद्मा २४ जना घाइते भएका छन्। इलाममा १० जना, भोजपुरमा ३ जना, खोटाङमा ३ जना, ललितपुरमा १ जना, मकवानपुरमा ३ जना, प्यूठानमा ४ जना, उदयपुरमा २ जना, ताप्लेजुङमा १ जना र धनकुटामा ३ जना घाइते भएका हुन्।

यस्तै, १८ जनाको हेली उद्धार गरिएको छ, जसमा इलामको माङ्सेबुङ गाउँपालिकाबाट पहिरोमा फसेका गर्भवती महिलासहितका नागरिकलाई समेत उद्धार गरिएको प्राधिकरणले जनाएको छ।

प्राधिकरणले अविरल वर्षा अझै केही स्थानमा जारी रहेको भन्दै सतर्कता अपनाउन नागरिकलाई आग्रह गरेको छ। साथै, जोखिमयुक्त क्षेत्रका बासिन्दालाई सुरक्षित स्थानमा सर्न अनुरोध गरिएको छ।