महोत्तरीमा केही दिनदेखि बिहान–साँझ बाक्लो हुस्सु, जनजीवन प्रभावित

9 महीना पहिले प्रकाशित

(2082-09-25 B.S.)

509 पटक देखिएको

भाग्यरेखा ठाकुर, महोत्तरी ।
महोत्तरी जिल्लामा केही दिनदेखि बिहान र साँझ बाक्लो हुस्सु लाग्न थालेपछि जनजीवन प्रभावित बन्दै गएको छ। हुस्सुसँगै चिसोको मात्रा पनि बढ्दै जाँदा सर्वसाधारणको दैनिक जीवन कष्टकर बनेको छ ।
बिहानपख हुस्सुका कारण सवारी साधन सञ्चालनमा कठिनाइ भएको छ भने सडकमा दृश्यता कम हुँदा दुर्घटनाको जोखिम समेत बढेको छ। विशेष गरी ग्रामीण क्षेत्रमा यात्रा गर्ने यात्रु तथा चालकहरू बढी प्रभावित भएका छन्। विद्यालय जाने बालबालिका, वृद्धवृद्धा तथा मजदुर वर्गलाई चिसो र हुस्सुले थप समस्या सिर्जना गरेको स्थानीयवासीहरूले बताएका छन्।
गौशाला नगरपालिका–१२ निवासी दिपेन्द्र शर्माका अनुसार बाक्लो हुस्सु र बढ्दो चिसोका कारण दैनिक कामकाज गर्न निकै कठिन भएको छ। “बिहानै हुस्सु लाग्दा घरबाहिर निस्कनै गाह्रो हुन्छ, काममा जान ढिलो हुने गरेको छ भने बालबालिकालाई विद्यालय पठाउँदा पनि चिन्ता लाग्छ,” उहाँले भन्नुभयो।
चिसो बढेसँगै किसानहरूको दैनिकीमा पनि असर परेको छ। बिहानै खेतबारीमा जान नसक्दा कृषि कार्य प्रभावित भएको छ भने तरकारी तथा गहुँजस्ता बालीमा हुस्सुको असर पर्न सक्ने चिन्ता किसानहरूमा देखिएको छ।
स्वास्थ्यकर्मीहरूका अनुसार अत्यधिक चिसो र हुस्सुका कारण रुघाखोकी, ज्वरो, दम तथा श्वासप्रश्वाससम्बन्धी समस्या बढ्ने सम्भावना रहेको छ। विशेष गरी बालबालिका र ज्येष्ठ नागरिकलाई न्यानो कपडा लगाउन, तातो खाना खान र आवश्यक सावधानी अपनाउन उहाँहरुले सुझाव दिनुभएको छ ।
स्थानीय प्रशासनले हुस्सुका कारण सवारी साधन चलाउँदा विशेष सतर्कता अपनाउन आग्रह गरेको छ। मौसम अझै केही दिन यस्तै रहने अनुमान गरिएकाले सर्वसाधारणलाई सचेत रहन अनुरोध गरिएको छ।