निरन्जन कुमार साह 

महोत्तरी, फाल्गुन ११ गते ।

महोत्तरी जिल्लाको लक्ष्मीनिया चौकस्थित कार्यालय परिसरमा बाके मरहा साझेदारी वन उपभोक्ता समूहको  वार्षिक साधारण सभा “जय हरियाली, जय साझेदारी” भन्ने मूल नाराका साथ भव्य र उत्साहजनक वातावरणमा सम्पन्न भएको छ। कार्यक्रममा उपभोक्ता सदस्य, स्थानीय जनप्रतिनिधि, वनकर्मी तथा सरोकारवालाको उल्लेखनीय सहभागिता रहेको थियो। कार्यक्रमका  संस्थापक अध्यक्ष रघुनाथ यादव ले २०५७ सालमा वन फँडानी नियन्त्रण, वन संरक्षण तथा दिगो व्यवस्थापनका उद्देश्यले साझेदारी वनको स्थापना गरिएको जानकारी दिए। उनले भने, “वन हाम्रो साझा सम्पत्ति हो, यसको संरक्षणमा सबैको समान जिम्मेवारी छ।” उनका अनुसार स्थापना कालदेखि नै समूहले सामुदायिक सहभागितामा आधारित वन व्यवस्थापनलाई प्राथमिकता दिँदै आएको छ। वन संरक्षण, व्यवस्थापन, वृक्षारोपण, वन क्षेत्रमा अतिक्रमण नियन्त्रण तथा उपभोक्तालाई आवश्यक काठ दाउरा उपलब्ध गराउनु समूहको मुख्य कार्यक्षेत्र रहेको उनले बताए। महोत्तरी जिल्लामा हाल जम्मा तीन वटा मात्र साझेदारी वन सञ्चालनमा रहेको जानकारी पनि उनले गराए।

मधेश प्रदेश वन निर्देशनालयका प्रतिनिधि मनोज ठाकुरले वनबाट उपभोक्ताले दाउरा, काठ, घाँस तथा रोजगारीसमेत प्राप्त गर्न सक्ने उल्लेख गरे। उनले वनलाई आयआर्जन, वातावरणीय सन्तुलन र जैविक विविधता संरक्षणको आधारका रूपमा व्याख्या गर्दै समितिलाई अझ प्रभावकारी र पारदर्शी सेवा प्रवाह गर्न आग्रह गरे।

उनले दीर्घकालीन कार्ययोजना निर्माण, वनको वैज्ञानिक व्यवस्थापन तथा स्थानीय युवालाई रोजगारी सिर्जना गर्ने कार्यक्रम अघि बढाउन सुझाव दिए। “वन जोगियो भने मात्र मानव जीवन सुरक्षित रहन्छ,” उनले भने।

समितिका पदाधिकारीहरूले गत वर्षको आय व्यय विवरण, काठ वितरण प्रक्रिया, वृक्षारोपण कार्यक्रम तथा वन संरक्षणसम्बन्धी गतिविधिहरूको जानकारी गराएका थिए । समूहका अध्यक्ष बलराम यादव ले हालसम्म ९५ प्रतिशत उपभोक्तालाई आवश्यक काठ वितरण गरिसकिएको जानकारी दिँदै बाँकी उपभोक्तालाई पनि छिट्टै सेवा उपलब्ध गराइने बताए। उनले २४ घण्टाभित्र काठ उपलब्ध गराउने प्रतिबद्धता दोहोर्‍याउँदै सेवा प्रवाहलाई अझ छिटो, पारदर्शी र व्यवस्थित बनाइने उल्लेख गरे । अध्यक्ष यादवले आगामी दिनमा वन क्षेत्र विस्तार, थप वृक्षारोपण, वन सुरक्षाका लागि निगरानी संयन्त्र सुदृढीकरण तथा उपभोक्ता सचेतना कार्यक्रम सञ्चालन गरिने योजना रहेको जानकारी दिए । वक्ताहरूले वन मानव सभ्यताको आधार र जीवनदायी स्रोत भएको उल्लेख गर्दै वन संरक्षणमा सबैको साझा प्रतिबद्धता आवश्यक रहेको धारणा राखेका थिए। वनले जलवायु सन्तुलन कायम राख्ने, भू क्षय रोक्ने र प्राकृतिक प्रकोप न्यूनीकरणमा महत्वपूर्ण भूमिका खेल्ने उनीहरूको भनाइ थियो।

कार्यक्रमको  अन्त्यमा सहभागीहरूले वन संरक्षण र दिगो उपयोगमा ऐक्यबद्धता जनाउँदै साझेदारीको भावना बलियो बनाउने प्रतिबद्धता व्यक्त गरेका थिए।

साधारण सभा सौहार्दपूर्ण र उत्साहपूर्ण वातावरणमा सम्पन्न भएको आयोजक समितिले जनाएको छ।