रसुवाका बाढीपीडितका लागि सम्सी गाउँपालिकाद्वारा १० लाख रुपैयाँ सहयोग घोषणा

2 महीना पहिले प्रकाशित

(2083-05-11 B.S.)

467 पटक देखिएको

महोत्तरी भदौं ११ गते ।

रसुवा जिल्लामा आएको विनाशकारी बाढीबाट प्रभावित नागरिकको राहत तथा पुनःस्थापनामा सहयोग पुर्‍याउने उद्देश्यले महोत्तरीको सम्सी गाउँपालिकाले १० लाख रुपैयाँ नगद सहयोग गर्ने घोषणा गरेको छ।

सम्सी गाउँपालिकाले विपद्को घडीमा मानवीय संवेदना र स्थानीय तहबीचको सहकार्यलाई प्राथमिकता दिँदै उक्त सहयोग उपलब्ध गराउने निर्णय गरेको जनाएको छ।

गाउँपालिकाका प्रमुख प्रशासकीय अधिकृत रञ्जित यादवका अनुसार रसुवामा आएको बाढीका कारण ठूलो जनधनको क्षति भएको खबरले गाउँपालिकालाई गहिरो दुःखी बनाएको छ। प्रभावित परिवारलाई राहत वितरण तथा पुनःस्थापनामा सहयोग पुर्‍याउने उद्देश्यले गाउँपालिकाले १० लाख रुपैयाँ उपलब्ध गराउने निर्णय गरिएको उनले जानकारी दिए।

उनले विपद्का बेला स्थानीय तहहरूले एकअर्काको दुःखमा साथ दिनु सामाजिक तथा नैतिक दायित्व भएको उल्लेख गर्दै सबै निकाय र समुदायलाई समेत विपद् प्रभावित नागरिकको सहयोगमा हातेमालो गर्न आग्रह गरे।

गाउँपालिकाले जारी गरेको प्रतिबद्धतामा प्राकृतिक विपद्का कारण कठिनाइमा परेका नागरिकलाई सक्दो सहयोग गर्न आफूहरू सदैव तयार रहने उल्लेख गरिएको छ। साथै, राहत रकम सम्बन्धित प्रक्रिया पूरा गरी प्रभावित क्षेत्रमा उपलब्ध गराइने गाउँपालिकाले जनाएको छ।

रसुवामा आएको बाढीले सडक, पुल, घर तथा सार्वजनिक संरचनामा व्यापक क्षति पुर्‍याएको छ भने धेरै परिवार विस्थापित भएका छन्। यस्ता कठिन परिस्थितिमा सम्सी गाउँपालिकाले गरेको आर्थिक सहयोगले राहत तथा पुनःस्थापनाको प्रयासमा केही टेवा पुग्ने विश्वास व्यक्त गरिएको छ।