कल्पनालाई यातना दिएपछि आत्महत्या

6 वर्ष पहिले प्रकाशित

(2077-03-28 B.S.)

1924 पटक देखिएको

जनकपुरधाम, असार २८ गते ।

ससुराली पक्षले जग्गाको विषयलाई लिएर यातना दिएपछि छोरीले आत्महत्या गरेको माइती पक्षले आरोप लगाएका छन् । गत मंगलबार जनकपुरधाम उपमहानगरपालिका ४ विद्यापती चोक स्थित २२ वर्षीय कल्पना ठाकुरले झुण्डिएर आत्महत्या गरेकी थिइन् ।

तर माइती पक्षले छोरीको सासु र पतिले पटक पटक यातना दिएपछि सहन नसकेर आत्महत्या गरेको आरोप लगाएका हुन् । कल्पनाकी आमा रिंकी पाण्डेले कल्पनाको पति र सासुले दहेजका लागि पटक–पटक ब्ल्याकमेलिङ गरेको दबाब सहन नसकेर झुण्डिएर आत्महत्या गरेको दाबी गरेकी छन् ।

८ लाख दाइजो दिएर २०७४ सालमा कल्पनाको विवाह महोत्तरीको महोत्तरी गाउँपालिका–२ डाम्ही महेशपुरका महेन्द्र ठाकुरको छोरा जितेन्द्र ठाकुरसँग भएको थियो । कल्पना केहि महिना पहिला देखी आफ्नो माइतीमै बस्दै आएकी थिइन् । कल्पनाकी आमाका अनुसार छोरी र ज्वाई बिच दाइजोको जग्गाको नामसारीको विषयलाई लिएर विवाद हुँदै आएको थियो ।

करिब १५÷२० दिन पहिला ज्वाई जितेन्द्र आफ्नो कार्यस्थल सर्लाहीको लालबन्दी फर्केपनि छोरी र ज्वाइ बिचमा फोनमा झगडा जारी नै रहेको रिंकीले बताईन् । ज्वाइले आफ्नो आमाको इसारामा छोरीलाई जग्गाको लागि पटक पटक मांसिक यातना दिदैं आएको आरोप रिंकीले आरोप लगाइन् ।

उनले भनिन्, ‘जग्गाको नामसारीको विषयमा ज्वाइले हामीलाई केही नभनि छोरीलाई तनाव दिदैँ आएका थिए । ज्वाइले फोनमा समेत कल्पनालाई गालीगलौज र अपशब्द प्रयोग गथ्र्यो ।’ ससुराली पक्षले विवाह भएको करिव एक बर्ष पश्चात नै छोरीलाई निरन्तर मांसिक तनाव दिदैँ आएको माइती पक्षले आरोप लगाएको छ ।

ससुराली पक्षले दिएको तनाव र पतिको गालीगलौज सहन नसकेर छोरीले आत्महत्या रोजेको कल्पनाकी बुवा दरोगा साहले बताए । धनको लोभमा परेर जितेन्द्रले छोरीसँग विवाह गरेको दरोगाको आरोप छ ।

दरोगाले दाइजोमा दिएको जग्गा छोरीको नाउँमा नामसारी गराउन चाहन्थे भने जितेन्द्रका आमाले जितेन्द्रकै नाउँमा जग्गा नामसारी गर्न दबाब दिएकी थिइन् । मृतक कल्पनाकी डेढ बर्षिय एउटा छोरा रहेको छ । यस घटनामा आफुहरु ससुराली पक्ष विरुद्ध आत्महत्या गर्न दुरुत्साहन गरेकोले मुद्दा दर्ता गर्न लागेको बताइन् ।

स्रोत ; टुडेपाटी