सप्तरीको राजविराजस्थित गजेन्द्रनारायण सिंह अस्पतालको आकस्मिक कक्ष शनिबारदेखि सञ्चालन

6 वर्ष पहिले प्रकाशित

(2077-04-10 B.S.)

1691 पटक देखिएको

राजविराज ,साउन १०

अस्पताल भर्ना भएका एक बिरामीमा कोरोना संक्रमण पुष्टि भएपछि सिल गरिएको सप्तरीको राजविराजस्थित गजेन्द्रनारायण सिंह अस्पतालको आकस्मिक कक्ष शनिबारदेखि सञ्चालनमा आएको छ ।

विष सेवन गरी भर्ना भएका तिलाठी कोइलाडी गाउँपालिका २ का ५० वर्षीय एक बिरामीमा कोरोना संक्रमण पुष्टि भएपछि शुक्रबार साँझ ७ बजेदेखि सिल गरिएको अस्पतालको आकस्मिक कक्ष निसंक्रमण गरी सञ्चालन गरिएको अस्पतालका निमित्त मेडिकल सुपरिटेन्डेन्ट डा रणजितकुमार झाले बताए ।

आकस्मिक कक्षका बिरामीलाई अन्य वार्डमा सारी निसंक्रमण गरेर बिरामीलाई पुनःअकास्मिक कक्षमा स्थान्तरण गरी सेवा दिन थालिएको डा झाले जानकारी दिए । राससका अनुसार कोरोना पोजेटिभ देखिएका बिरामीको नियमित परीक्षण र रेखदेखमा खटिएका चार चिकित्सकसहित १४ जना स्वास्थ्यकर्मीलाई क्वारेन्टाइनमा राखिएको छ ।

स्वास्थ्यकर्मीको टोलीलाई राजविराजस्थित होटेलको क्वारेन्टाइनमा राखिएको छ । क्वारेन्टाइनमा पठाइएका एक जना चिकित्सक भने होटल नगई राजविराजस्थित निजी अस्पतालमा खटिरहेका छन् ।

आकस्मिक कक्षमा कार्यरत १४ जना स्वास्थ्यकर्मी क्वारेन्टाइनमा गएपछि अस्पतालको सेवा प्रभावित भएको डा झाले बताए । सप्तरीमा संक्रमितको संख्या बढेर चार सय २६ पुगेको स्वास्थ्य कार्यालय सप्तरीले जनाएको छ ।