महोत्तरी जिल्लामा निषेधाज्ञाको समयअवधि पाँचौ पटक पुनः थपियो

6 वर्ष पहिले प्रकाशित

(2077-05-10 B.S.)

1840 पटक देखिएको

भदौ १०

महोत्तरी जिल्लामा निषेधाज्ञाको समयअवधि पाँचौ पटक पुनः थपिएको छ ।

प्रमुख जिल्ला अधिकारी कृष्णबहादुर कटुवालले जिल्लामा कोरोनाको जोखिम बढ्दै गएको र समुदाय स्तरमा फैलिएकोले संक्रमण रोकथाम तथा नियन्त्रणका लागि थप सतर्कता अपनाउन निषेधाज्ञाको समयअवधि भदौ १० गते बुधबार राति १२ बजेदेखि भदौ १५ गते राति १२ बजेसम्मका लागि महोत्तरी जिल्लाभरि थपिएको जानकारी दिए ।

प्रजिअ कटुवालले कोरोना संक्रमणको प्रभावकारी रोकथाम तथा नियन्त्रण र यसको संक्रमण फैलिन नदिनका लागि जिल्लाभरी प्रतिकूल प्रभाव पर्नसक्ने कुनै किसिमको गतिविधि हुन र गर्न नदिन नेपाल राजपत्रमा तोकिएको अत्यावश्यक सेवाहरु बाहेकका अन्य सबै सेवा र स्थलहरु फेरि आगामी ५ दिनसम्मका लागि स्थानीय प्रशासन ऐन,२०२८ को दफा ६ (३) र संक्रामक रोग ऐन २०२० को दफा २ बमोजिम जिल्ला सुरक्षा समितिको निर्णय अनुसार पाँचौ पटक निषेधाज्ञाको आदेश दिइएको जानकारी दिए । उनले अत्यावश्यक पसलहरु (खाद्यान्न, फलफूल, तरकारी, दूध डेरी) बिहान ६ बजेदेखि बिहान ९ बजेसम्म अनिवार्य पञ्जा, मास्क एवं स्यानिटाईजरको प्रयोग गरि सामाजिक दूरी कायम गरेर मात्र सञ्चालन गर्न आग्रह गरेका छन् ।

प्रशासनले औषधि पसल, खाद्यान्न, फलफूल तथा तरकारी, अस्पताल तथा स्वास्थ्य केन्द्र सञ्चालन सम्बन्धी सेवा, मालसामान ओसारपसार गर्ने तथा निर्माण कार्यमा प्रयोग हुने ढुवानीका यातायात, सरकारी छापाखाना, सञ्चार सेवा, बैंकिङ सेवा, आन्तरिक सुरक्षा कार्य, खानेपानी सञ्चालन तथा वितरण, पेट्रोलियम पदार्थको ढुवानी भण्डारण र वितरण, फोहोरमैला संकलन तथा ढुवानी, विद्युत सेवा, कृषिजन्य कार्य तथा कृषि तथा पशुपंक्षीजन्य उत्पादन, ढुवानीमा प्रयोग हुने साधन, वर्कशपलाई अत्यावश्यक सेवा उल्लेख गरेको छ ।

प्रशासनको यस आदेशलाई उल्लंघन गर्ने व्यक्तिलाई स्थानीय प्रशासन ऐन २०२८ तथा संक्रामक रोग ऐन २०२० बमोजिम कारबाही गरिने चेतावनी समेत दिइएको छ ।