आन्तरिक हवाई सेवा सोमवारदेखि खुल्ने,भाडा यथावत

6 वर्ष पहिले प्रकाशित

(2077-06-04 B.S.)

1843 पटक देखिएको

असोज ४

कोरोना महामारी नियन्त्रणकालागि सरकारले लगाएको लकडाउन र निषेधाज्ञाका कारण लामो समयदेखि बन्द रहेका आन्तरिक हवाई सेवा सोमवारदेखि खुल्ने भएको छ ।

सरकारले ५० प्रतिशत मात्र यात्रु राखेर उडान गर्न भनेपछि वायुसेवा सञ्चालकले उडान गर्न नसकिने भन्दै विरोध गरेका थिए । तर संस्कृति, पर्यटन तथा नागरिक उड्डयनमन्त्री योगेश भट्टराईको ग्रिन सिग्नलले शतप्रतिशत नै यात्रु राखेर उडाउने तयारीमा एयरलाइन्सहरु छन् ।

मन्त्रालयले सबै वायुसेवा कम्पनीहरुलाई पत्राचार गर्दै सोमबार भोलिबाट नियमित आन्तरिक उडान सुरु हुने जानकारी दिएका छन् ।

यति एयरलाइन्सका महाप्रबन्धक समेत रहेका रिमालले सो एयरलाइन्स सबै प्रक्रिया पुरा गरेर भोलिको दिन कुरेर बसेको बताउँछन् । हाललाई २५ प्रतिशत उडान हुनेछ । सबै विमानस्थलमा उडान हुनेछ । आवश्यकताअनुसार उडान संख्या बढाउने गरी भोलिबाट उडान शुरु हुन लागेको हो ।

यसअघि सरकारले भदौ १ गतेदेखि उडान गर्ने निर्णय गरेको थियो । सोहीअनुसार बायुसोवा कम्पनीहरुले उडानको तयारी गरे । तर पछि कोरोना संक्रमण बढेको भन्दै पुन १५ दिन उडान बन्द गर्ने सरकारी निर्णपछि वायुसेवा सञ्चालकहरु रुष्ट भएका थिए ।

फेरि भदौ १६ गते पनि उडान गर्न नदिए आन्दोलनमा जाने चेतावनी समेत दिए । तर सो समयमा पनि उडान हुन सकेन ।

कोरोना महामारीका कारण करिब ६ महिना व्यावसायिक उडान बन्द हुँदो निजी क्षेत्रका हवाई सेवा कम्पनीहरूले ठुलो नोक्सानी बेहोरेको हवाई व्यवसायीको भनाइ छ । बन्दाबन्दीको समयमा केही राहत तथा चार्टर उडानबाहेक कुनै उडान हुन नसक्दा उड्डयन क्षेत्रले ठूलो नोक्सानी बेहोर्नुपरेको व्यवसायीको भनाइ छ ।

झण्डै ६ महिनापछि आफ्ना मागअनुसार नै उडान गर्न पाउने भएपछि वायुसेवा सञ्चालकहरुमा खुसी छाएको छ । भोलिदेखि आन्तरिक उडानका लागि सबै तयारी पुरा भएको वायु सेवा सञ्चालक संघका उपाध्यक्ष अनोज रिमालले जानकारी दिए ।