उद्योगहरूबाट निस्किने धूवाँ, धूलोको बाराका दलितबस्तीका बासिन्दा प्रभावित

6 वर्ष पहिले प्रकाशित

(2077-06-05 B.S.)

4526 पटक देखिएको

बारा ,असोज ५

बाराको जीतपुरसिमरा उपमहानगरपालिका वडा नं.५ मा रहेका उद्योगहरूबाट निस्किने धूवाँ, धूलोको कारण त्यहाँका दलितबस्तीका बासिन्दालाई अप्ठेयारो भइरहेको छ।

उद्योगको ब्वाइलरबाट निस्किने धूवाँ, धूलोले आँखा र फोक्सोमा असर परेर धेरैजना बिरामी भएको दलितबस्तीका राजु रामले गुनासो गरेका छन। उनले उद्योगबाट निस्किने धूवाँ र धूलोलाई व्यवस्थित गर्नेतर्फ सम्बन्धित निकायले पहल नगरेको आरोप लगाउनु भयो। उद्योगबाट निस्किने धूवाँ धूलोको कारण खाना पकाउँदा, कपडा सुकाउँदा र घरमा बस्दा पनि समस्या झेल्नुपरेको उनको भनाइ छ। दलितबस्तीका बासिन्दाले उद्योगीहरूलाई सो बारे बारम्बार अवगत गराउँदा पनि बेवास्ता गरिरहेको बताएका छन ।

वडाध्यक्ष मोहित चौधरीले उद्योगबाट निस्किने फोहरमैलाको व्यवस्थापन गर्ने दायित्व ऐनमा सम्बन्धित उद्योगको भएपनि यसतर्फ उद्योगीहरूले बेवास्ता गर्दै आएको बताउनु भयो।

वडाध्यक्ष चौधरीले आवश्यक स्रोत, साधन र पूर्वतयारीविना उद्योग सञ्चालन भइरहेकाले समस्या भएको र यसतर्फ स्थानीय प्रशासनले उजूरी सुनेर कारबाई गर्नुपर्ने माग गरेका छन्। त्यहाँ रहेका उद्योगीहरूले भने आरोप गलत भएको बताएका छन्। उनीहरूले थर्मल साइक्लोन प्रणालीको आधुनिक प्रविधिबाट ब्वाइलर जडान गरिएको र सोबाट छाई उडेर दलितबस्तीलाई समस्या भएको भन्ने विषय गलत भएको बताएका छन।

उनीहरूले त्यस्तो समस्या भएको भए उद्योगीहरूलाई अवगत गराइनुपर्ने तर अहिलेसम्म कसैले गुनासो नगरेको बताएका छन।