मंसिर १७ 

कोरोना महामारीका कारण सेलाएको नेपाली काँग्रेसको महाधिवेशनको सरगर्मी फेरि तात्न थालेको छ । महाधिवेशनका लागि आफ्नो पक्षमा माहोल बनाउन नेताहरु जिल्ला दौडाहामा निस्कन थालेका छन् । कात्तिक २८ गतेको केन्द्रीय समिति बैठकले मंसिरभित्र क्रियाशील सदस्यता वितरणको काम सक्न जिल्ला कार्यसमितिलाई निर्देशन दिएपछि नेताहरु काठमाडौं उपत्यकाबाट बाहिरिन थालेका हुन् ।

यतिबेला जिल्ला दौडाहामा निस्किनेहरुमा अधिकांश संस्थापन पक्षका नेता छन् । संगठन विभाग प्रमुख गोपालमान श्रेष्ठ, महामन्त्री पूर्णबहादुर खड्का, सहमहामन्त्री प्रकाशशरण महत, नेता एनपी साउद, ज्ञानेन्द्र कार्की, डा. नारायण खड्का, शंकर भण्डारी, किशोरसिंह राठोर, नैनसिंह महरलतायतका नेता जिल्ला दौडाहामा छन् । कोही नेता केही दिनको जिल्ला दौडाहापछि काठमाडौं फर्किएको अवस्था छ भने कोही अझै जिल्लामै छन् ।

मुलुकमा कोरोना महामारीको प्रभाव नहुँदै विभिन्न जिल्लामा पुगेर आफ्नो पक्षमा माहोल बनाउन प्रयास गरेको संस्थापन इतरपक्ष पनि फेरि जिल्लाहरुको भ्रमणमा निस्किन थालेको छ । गत वर्ष माघमा महाधिवेशन कार्यतालिका प्रकाशित भएपछि वरिष्ठ नेता रामचन्द्र पौडेल पक्षका नेताहरु जिल्ला दौडाहामा निस्किएका थिए । तर कोरोना महामारीका कारण महाधिवेशनसम्बन्धी गतिविधि हुन नसक्ने भएपछि उनीहरुले आफ्नो अभियान रोकेका थिए ।

पौडेल पक्षले सुरुमा एकत्रित भई प्रदेश २ मा आफ्नो नाडी छाम्ने प्रयास गरेको थियो । जसमा नेता पौडेलसहित महामन्त्री डा शशांक कोइराला, केन्द्रीय सदस्य प्रकाशमान सिंह, अर्जुननरसिंह केसी, सुजाता कोइराला, शेखर कोइराला लगायतका नेता सहभागी थिए ।

गण्डकी र लुम्बिनी प्रदेशका केही जिल्लामा नेता कार्यकर्ता भेटघाटपछि कोरोना महामारीले पौडेल पक्षको प्रभाव विस्तारमा ब्रेक लगाएको थियो । यद्यपि नेता शेखर कोइराला भने कोरोना प्रभावलाई चुनौती दिँदै जिल्ला दौडाहालाई पूर्ण रुपमा ब्रेक लगाएनन् ।

गत फागुन १० बाट लुम्बिनी प्रदेशका जिल्लाहरुको यात्रा थालेका शेखरले कोरोना महामारीमा प्रदेशको यात्रा जारी राखे । सुरुमा शेखर कोइरालाको अभियानमा नेतृ सुजाता कोइराला, केन्द्रीय सदस्यहरु चन्द्र भण्डारी र गगन थापा, दिपक गिरी, बर्दिया काँग्रेसका सभापति संजय गौतम, राष्ट्रिय योजना आयोगका पूर्व उपाध्यक्ष डा गोविन्दराज पोख्रेललगायत पनि साथ थिए । तर कोरोना महामारीका कारण सहयात्रीहरुले अभियान छोडे पनि शेखर एक्लै विभिन्न जिल्लामा पुगिरहे । उक्त क्रम उनले अहिले पनि जारी राखेका छन् ।

यता, वरिष्ठ नेता पौडेल पनि मंगलबार (आज) गृह जिल्ला तनहुँमा पुगेका छन् भने महामन्त्री शशांक कोइराला आफ्नो निर्वाचन क्षेत्र नवलपरासीबाट भर्खरै काठमाडौं फर्किएको बुझिएको छ ।

यस्तै, काँग्रेसको तेस्रो समूह पनि जिल्ला दौडाहामै छ । तेस्रो समूहका नेता कृष्णप्रसाद सिटौला जिल्ला दौडाहमा निस्किने तयारी छ भने गगन थापा, प्रदीप पौडेल, उमाकान्त चौधरीलगायत पनि उपत्यका बाहिर–भित्र गरिरहेका देखिन्छन् ।

यतिबेला नेताहरुको जिल्ला दौडाहाको मुख्य उद्देश्य क्रियाशील सदस्यतामा खेलेर जिल्ला तहमा प्रभाव जमाउने नै देखिन्छ ।

नयाँ संरचना अनुसार काँग्रेसले स्थानीय तहका ६ हजार ७ सय ४३ वडा, ७ सय ५३ स्थानीय तह, ३ सय ३० प्रदेश निर्वाचन क्षेत्र, १ सय ६५ प्रतिनिधिसभा निर्वाचन क्षेत्र, ७७ जिल्ला, ७ प्रदेश र केन्द्र गरी आठ तहको नेतृत्व छनोट गर्नुपर्नेछ । जसको मुलआधार क्रियाशील सदस्यतासँग जोडिन्छ ।

महाधिवेशनका लागि शक्ति सञ्चयको होडबाजीका बीच नेताहरु कार्यकर्तालाई आफ्नो पक्षमा पार्ने प्रयासमा विभिन्न जिल्लामा पुग्न थालेका हुन् ।

सभापति शेरबहादुर देउवाले जिल्लाहरुमा आफ्नो अवस्थाको लेखाजोखाका लागि निकट नेताहरुलाई उपत्यका बाहिर पठाएको बुझिएको छ । संस्थापन इतरपक्ष देउवालाई असफल सिद्ध गरेर महाधिवेशनमा आफूलाई विकल्पको रुपमा खडा गर्न कार्यकर्तामाझ पुग्न थालेको छ भने देउवाले पनि जिल्लाहरुमा आफ्ना सहयोगीलाई परिचालन गरेर आफ्नो पक्षमा माहोल बनाउन थालेका छन् ।