स्थानीय तहको निर्वाचन खर्चिलो ,प्रभाव जनतामा –उपेन्द्र यादव

4 वर्ष पहिले प्रकाशित

(2079-02-10 B.S.)

9906 पटक देखिएको

गौशाला

जसपा नेपालका केन्द्रिय अध्यक्ष उपेन्द्र यादवले स्थानीय तहको निर्वाचन अत्याधिक खर्चिलो भएको र त्यसको प्रत्यक्ष प्रभाव जनतामा परेको बताएका छन् ।

पूर्व उपप्रधानमन्त्री समेत रहेका अध्यक्ष यादवले बढ्दो महंगीले केवल जनताले शास्ती भोग्नुपरेको बताएका छन् । मंगलबार गौशालामा नवनिर्वाचित जनप्रतिनिधिलाई बधाई/ शुभकामना आदानप्रदान तथा पार्टी प्रवेश कार्यक्रममा आफ्नो मन्तव्य दिँदै उनले यस्तो बताएका हुन् ।

उनले भने, “ चुनाव महङ्गो भएको कारणले इमान्दार, गरिब, किसान, मजदुरलाई चुनाव लड्न मुस्किल छ । यो प्रणालीबाट लोकतन्त्र मजबुत हुँदैन। यसको बोझ प्रत्यक्ष जनतामा पर्छ ।"

उनले अहिलेको निर्वाचन प्रणाली ‘खिचडी निर्वाचन प्रणाली’ भएको संज्ञा दिएका छन् ।

गौशाला नगरपालिकामा प्रतिकूल परिस्थिति र कठिनाइको अवरोध भएतापनि जसपा पार्टीको उम्मेदवारलाई आफ्नो अमुल्य मत दिएर विजयी गराएकोले उनले जनसमुदायमा धन्यवाद ज्ञापन गरेका छन् ।

त्यस्तै पूर्व कृषिमन्त्री हरिनारायण यादवले जसपा पार्टी वैकल्पिक शक्तिको रुपमा विभेद अन्त्य गर्ने पार्टी भएको बताएका छन् । साथै उनले जुन भरोसाले गौशाला बासीले जसपा पार्टीलाई आफ्नो मत दिएर जिताएका छन्, त्यो भरोसा कायम राख्न जनप्रतिनिधिहरु सँग अनुरोध गरेका छन्।

त्यस्तै पार्टीका केन्द्रीय सदस्य लक्ष्मी महतोले शान्ति र सुशासन कायम गर्नको लागि प्रहरी प्रशासनलाई आफ्नो काम कर्तव्य पूरा गर्न दिन जनसमुदायमा अपिल गर्दै जनप्रतिनिधिहरुलाई वाधा नपुर्याईकन कार्य गर्न दिनको लागि अपिल गरेका छन् ।

पार्टीका केन्द्रिय अध्यक्ष यादवको प्रमुख आतिथ्यमा सम्पन्न भएको उक्त कार्यक्रममा नवनिर्वाचित नगर प्रमुख डा.दिपेन्द्र महतो ,उपप्रमुख रेणु कुमारी महतो , केन्द्रीय सदस्य लक्ष्मी महतो , हरिनारायण यादव, पूर्व स्वास्थ्य राज्यमन्त्री डाक्टर सुरेन्द्र यादव, पार्टीका नगर संयोजक कुमरकान्त झा लगायत विभिन्न जनप्रतिनिधि, समाजसेवी र जन समुदायको सहभागिता रहेको थियो ।

कार्यक्रममा नेपाली कांग्रेसका पुर्व क्षेत्रीय सभापति रामश्रेष्ठ महतो नेपाली कांग्रेस परित्याग गरि जसपामा प्रवेश गरेका छन् । साथै विभिन्न पार्टी परित्याग गरि सयौको संख्यामा जसपा पार्टी प्रवेश गरेका छन् ।