महोत्तरीको बलवा नगरपालिका पूर्ण खोप पालिका घोषणा

1 वर्ष पहिले प्रकाशित

(2081-01-28 B.S.)

1327 पटक देखिएको

निरन्जन कुमार साह
महोत्तरी , बैशाख २८ गते

महोत्तरीको बलवा नगरपालिका पूर्ण खोप पालिका घोषणा भएको छ । शुक्रबार एक कार्यक्रमका बीच पूर्ण खोप पालिका घोषणा गरिएको हो । नगरपालिकाको एघार ओटै वडाको अवलोकन र निरीक्षण गर्दा खोप लगाउन कोहि पनि नछुटेकोले पूर्ण खोप पालिका घोषणा गरिएको नगरपालिकाका स्वास्थ्य शाखा प्रमुख यमुना प्रसाद यादवले जानकारी दिए । पालिकाले शुक्रबार १६ देखि ५९ महिनासम्मका सबै बालबालिकाहरुलाई १५ महिनाको उमेरभित्र लगाउनुपर्ने सम्पूर्ण खोप लगाइएकोले पूर्ण खोप पालिकाको प्रमाण पत्र जिल्लाको खोप समन्वय समितिको सचिवालयले बलवा नगरपालिकालाई प्रदान गरेसँगै पूर्ण खोप पालिका घोषणा भएको हो ।

कार्यक्रममा स्वागत मन्तव्य दिदै पालिका प्रमुख मित्रलाल ढकालले बलवा नगरपालिकाको सम्पूर्ण कर्मचारी इमान्दार रहेको र आफुलाई हरेक कार्यमा सक्दो सहयोग गरेको जिकिर गरे । उनले खोपको लागि पालिका वासीले चिन्ता लिनै नपर्ने बताए जनसमुदायको सहयोगले यो सम्भव रहेको उनको भनाइ थियो ।

नगर प्रमुख रामविजय महतोले जनप्रतिनिधि, स्वास्थ्यकर्मी, महिला स्वास्थ्य स्वयंमसेविका र आम जनताको सकृयतामा पूर्णखोप पालिका घोषणा हुन सफल भएको बताए । उनले पालिकाले स्वास्थ्य क्षेत्रलाई महत्त्वपूर्ण स्थानमा राखेर कार्यक्रमहरू अगाडि बढाएको पनि जानकारी दिए ।

पालिकाको स्वास्थ्य शाखा सह-संयोजक रामकुमारले पालिकालाई पूर्ण खोप घोषणा गर्नको लागि दिनरात मेहनत गरेको बताए ।

जिल्ला स्वास्थ्य प्रमुख सुनिता गुप्ताले रोग प्रतिरोधात्मक क्षमता बढाउन अनिवार्य खोप लगाउनु पर्ने बताइन् । मुलुकको दक्ष र अब्बल जनशक्ति निर्माण गर्न अहिले स्वास्थ्य नागरिक हुन जरुरी रहेको जिकिर गर्दै उनले खोप उमेर समूहका सबै बालबालिका खोपको पहुँचमा हुनुपर्ने बताईन् ।

कार्यक्रममा जिल्ला समन्वय समितिका सभापति सुमन लाल कर्ण , प्रमुख जिल्ला अधिकारी शिवराम गेलाल , बलवा नगरपालिकाका नगर प्रमुख रामविजय महतो , उपप्रमुख रामदुलारी देवी , प्रमुख प्रशासकीय अधिकृत मित्रलाल ढकाल लगायत विभिन्न कर्मचारी , संचारकर्मीहरुको सहभागिता रहेको थियो । पूर्ण खोप सुनिश्चितता कार्यक्रमकै अवसरमा पालिकाका महिला स्वास्थ्य स्वयंमसेविकालाई प्रसंशा पत्र वितरण गरिएको छ ।