महोत्तरीमा एमालेको ‘लाल किला’ बनाउने मन्त्री यादवको घोषणा

10 महीना पहिले प्रकाशित

(2081-11-05 B.S.)

768 पटक देखिएको

महोत्तरी , फाल्गुन ५ गते ।
नेपाल कम्युनिष्ट पार्टी (एमाले) को सांगठनिक विस्तारलाई तीव्र बनाउँदै महोत्तरीलाई ‘लाल किला’ मा रूपान्तरण गर्ने लक्ष्यसहित भौतिक पूर्वाधार विकास मन्त्री सरोज कुमार यादवले ठूलो संख्यामा सदस्यता वितरण गर्ने योजना अघि सारेका छन्।

गौशालास्थित कबड हलमा आयोजित वडा केन्द्रित अभिमुखीकरण कार्यक्रमको समुद्घाटन समारोहमा मन्त्री यादवले महोत्तरीका प्रत्येक पालिकाका वडामा एमाले पार्टीको सदस्यता वृद्धि गर्ने लक्ष्य लिएको बताए। साथै उनले आउँदो २०८४ को निर्वाचनमा एमाले नेतृत्वको सरकार बनाउने प्रतिबद्धता जनाए।
तर, उनले जिल्ला स्तरीय अभिमुखीकरण कार्यक्रममा अपेक्षाकृत कार्यकर्ता उपस्थिति नदेखिएकोप्रति असन्तोष व्यक्त गरे। उनले कम्तीमा १ हजार कार्यकर्ता उपस्थित हुनुपर्नेमा मात्र ५ सय जना सहभागी भएको बताउँदै यो अवस्था पार्टीका लागि दुर्भाग्यपूर्ण रहेको उनले टिप्पणी गरे। संगठन सुदृढीकरणका लागि कार्यकर्ताहरूलाई अझ सक्रिय हुन निर्देशन दिँदै, उनले माघदेखि सुरु हुने वडा-पालिका स्तरीय विस्तार कार्यक्रमलाई तीव्र गतिमा अगाडि बढाउन आग्रह गरे।

उक्त कार्यक्रममा एमालेका केन्द्रीय उपाध्यक्ष राम बहादुर थापा, पूर्वमन्त्री तथा मधेश प्रदेश इन्चार्ज लिलानाथ श्रेष्ठ, मधेश प्रदेशका भौतिक पूर्वाधार विकास मन्त्री सरोज कुमार यादव, प्रतिनिधि सभा सदस्य लक्ष्मी महतो कोइरीलगायतका नेता तथा कार्यकर्ताहरूको उपस्थिति रहेको थियो।