भ्रष्टाचार, वेथिति र प्रतिगमनविरुद्ध खबरदारी गर्न सोनमामा माओवादी केन्द्रको बैठक सम्पन्न

3 महीना पहिले प्रकाशित

(2081-12-11 B.S.)

594 पटक देखिएको

निरन्जन कुमार साह

महोत्तरी, चैत्र ११ गते

नेपाल कम्युनिस्ट पार्टी (माओवादी केन्द्र) द्वारा भ्रष्टाचार, वेथिति र प्रतिगमनविरुद्ध खबरदारी गर्न आगामी चैत्र १५ गते काठमाडौंमा आयोजना गर्न लागिएको प्रदर्शनको सन्दर्भमा महोत्तरीको सोनमा गाउँपालिकामा एक तयारी बैठक सम्पन्न भएको छ।

सोनमा गाउँपालिका–६ मगरथानामा सम्पन्न सो बैठकमा पार्टीका गाउँपालिका अध्यक्ष राधेश्याम झाको अध्यक्षता रहेको थियो भने केन्द्रिय नेता सूर्य नारायण साह प्रमुख अतिथि थिए। बैठकमा वडा अध्यक्ष, युवा संगठन, अखिल क्रान्तिकारी, महिला संगठनलगायत पार्टीका विभिन्न जनवर्गीय संगठनका प्रतिनिधिहरूको उपस्थिति थियो।

बैठकमा नेता साहले वर्तमान सरकार र सत्ताधारी निकायहरू भ्रष्टाचारमा संलग्न भएको, जनताको अधिकार कुण्ठित भएको र लोकतान्त्रिक मूल्यहरूमाथि आघात भइरहेको आरोप लगाए। उनले भने, “देशमा अहिले एक किसिमको प्रतिक्रियावादी प्रवृत्तिको उदय भइरहेको छ। जनताको विश्वास र बलिदानबाट प्राप्त लोकतन्त्रमाथि खेलबाड हुँदैछ। त्यसको विरोधमा हामी सबै एकजुट भएर खबरदारी गर्नुपर्नेछ।”

बैठकमा उपस्थित अधिकांश सहभागीहरूले देशमा बढ्दो भ्रष्टाचार र जनताको आधारभूत अधिकार हननप्रति गम्भीर चिन्ता व्यक्त गरेका थिए। उनीहरूले पार्टीको खबरदारी अभियानमा पूर्ण समर्थन जनाउँदै सांगठनिक रूपमा सक्रिय भूमिका निर्वाह गर्ने प्रतिबद्धता व्यक्त गरे।

पार्टीका स्थानीय नेताहरूले भने, “अब चुप लागेर बस्ने समय छैन। जनता सशक्त छन्, हामी सडकमा उत्रेर जनताको आवाज बुलन्द बनाउनेछौं।”