रोहित यादव

महोत्तरी, फाल्गुन ८ गते ।

नेपाली कम्युनिस्ट पार्टीका युवा उम्मेदवार ई. लक्ष्मण यादवले भंगाहा नगरपालिका वडा नं. ५ मा आफ्नो घरदैलो अभियानलाई तीव्र बनाएका छन्। युवापुस्ताको प्रतिनिधित्व गर्दै चुनावी मैदानमा उत्रिएका यादव यतिबेला टोल–टोलमा पुगेर मतदातासँग प्रत्यक्ष संवाद गरिरहेका छन्।
घरदैलो अभियानका क्रममा उनले स्थानीय बासिन्दासँग हातेमालो गर्दै आशीर्वाद र समर्थन मागिरहेका छन्। मतदातासँग खुलेर संवाद गर्दै उनले अब देशमा पुरानै शैलीको राजनीति नभई पारदर्शी, जवाफदेही र परिणाममुखी शासन आवश्यक रहेको धारणा व्यक्त गरे।
यादवले भने, “देशमा पटक–पटक पुराना अनुहारलाई जिताइयो, तर जनताको अवस्था जस्ताको तस्तै रह्यो। विकास निर्माणका काम अधुरा छन्, युवाहरू रोजगारीका लागि विदेशिन बाध्य छन्, शिक्षा र स्वास्थ्य सेवा सर्वसुलभ छैन। अब नयाँ सोच र नयाँ नेतृत्वको खाँचो छ।”
उनले भदौ २३ र २४ गते सम्पन्न आन्दोलनको स्मरण गर्दै त्यसलाई देश परिवर्तनको ऐतिहासिक संकेतका रूपमा व्याख्या गरे। “त्यो आन्दोलन कुनै व्यक्ति वा दल विशेषका लागि थिएन, त्यो समग्र राष्ट्र परिवर्तनको आवाज थियो। जनताको चाहना परिवर्तन हो भन्ने सन्देश त्यसले दिएको छ,” उनले बताए।यादवले अबको सरकार निष्ठावान र जनउत्तरदायी हुनुपर्ने तर्क गर्दै युवाहरूले नेतृत्व सम्हाले मात्र देशलाई सही दिशामा अघि बढाउन सकिने विश्वास व्यक्त गरे। “हामी डिजिटल युगमा छौं। अब नीति निर्माणदेखि कार्यान्वयनसम्म प्रविधिमैत्री, पारदर्शी र उत्तरदायी प्रणाली आवश्यक छ,” उनले जोड दिए।
राजनीतिमा प्रवेश गर्नुको उद्देश्य स्पष्ट पार्दै उनले भने, “म पदका लागि होइन, जिम्मेवारीका लागि राजनीतिमा आएको हुँ। जनताको सेवा, रोजगारीको सुनिश्चितता, गुणस्तरीय शिक्षा, सहज स्वास्थ्य सेवा र सुशासन स्थापना मेरो प्राथमिकता हो।”
घरदैलो अभियानका क्रममा स्थानीय बासिन्दाहरूले पनि सकारात्मक प्रतिक्रिया दिएका छन्। धेरै मतदाताले युवाको उम्मेदवारीलाई आशाको किरणका रूपमा लिएका छन्। “अब नयाँ पुस्तालाई अवसर दिनुपर्छ, पुरानाले धेरै अवसर पाए,” एक स्थानीय मतदाताले प्रतिक्रिया दिए।
भंगाहा क्षेत्रमा युवाहरूको उल्लेखनीय सहभागिता देखिएको छ। अभियानमा सहभागी युवाहरूले सामाजिक सञ्जालमार्फत पनि यादवको एजेन्डा प्रचार–प्रसार गरिरहेका छन्, जसले चुनावी माहोलमा नयाँ ऊर्जा थपिएको संकेत गरेको छ।
अन्त्यमा उम्मेदवार यादवले भावुक हुँदै भने, “अब परिवर्तनको समय आएको छ। यो परिवर्तन जनताबाटै सम्भव छ। म जनताको साथ, विश्वास र आशीर्वाद लिएर अघि बढ्न चाहन्छु।”
यसरी नेपाली कम्युनिस्ट पार्टीका युवा उम्मेदवार ई.लक्ष्मण यादवको घरदैलो अभियानले महोत्तरीको राजनीतिक माहोलमा नयाँ बहस र आशा जन्माएको देखिन्छ। अब मतदाताको निर्णयले आगामी राजनीतिक दिशा तय गर्नेछ।